Саха сирэ – анал байыаннай дьайыыга

Эрдэ суруйбуппут курдук, СӨ бырабыыталыстыбатын 2025 сыллааҕы үлэтин Ил Дархан Ил Түмэн (Судаарыстыбаннай Мунньах) иннигэр бүгүн отчуоттаата. Онно этиллибити барытын эридьиэстии олорбокко, сүрүн сыыппараларга уонна чахчыларга тохтуохпут.

Отчуот барыбытын да долгутар тутаах тиэмэттэн – анал байыаннай дьайыыттан, чопчута, онно туох көмө, өйөбүл оҥоһуллубутуттан саҕаланна.

Ол курдук, былырыын анал байыаннай дьайыыга Саха сириттэн 3,5 тыһ. тахса автомототехника, тэрил тиэрдиллибит.  Оттон СВО саҕаланыаҕыттан уопсай 4,1 млрд солк. тахса суумалаах тиэхиньикэ, тэрил ыытыллыбыт. Онно сулууспалыы сылдьар биир дойдулаахтарбытыгар 1800 т тахса ыйааһыннаах гуманитарнай көмө барбыт.

2025 сылга байыаннай дьайыыга кыттар, кыттыбыт байыаннай сулууспалаахтарга уонна кинилэр дьиэ кэргэннэрин араас өттүттэн кэлимник өйүүр көмөнү оҥорорго 10 млрд 819 мөл. солк. туттуллубут.

СВО кыттыылаахтара, кинилэр чугас дьонноро доруобуйаларын көннөрүнэллэригэр, социальнай адаптацияны баралларыгар анаан М.Е. Николаев аатынан Мэдиссиинэ киинигэр, СӨ Мэдиссиинэ реабилитациятын киинигэр куойкалар анаммыттар, «Бэс Чагда» санаторийга доруобуйаларын көннөрүнэллэригэр  стационар үлэлиир.

Тыһыынчаттан тахса СВО кыттааччыта уонна чугас дьонноро кэлим социальнай реабилитацияны санаторий-куруорт усулуобуйатыгар ааспыттар. Ааспыт сыл Дьарыктаах буолуу киинин нөҥүө 340 байыаннай дьайыы кыттыылааҕа уонна кинилэр чугас дьонноро үлэ булуммуттар.

СВО кыттыылаахтарыгар үлэ миэстэтин уурар аналлаах СӨ сокуонугар уларытыы киирбит.

Кыайыы күнүн иннинэ "Саха сирэ – дьоруойдар дойдулара" диэн СВО кыттыылаахтарыгар анаммыт каадыры бэлэмниир бырагырааманы бастакынан үөрэнэн бүтэрбит 25 киһиэхэ дьупулуомнарын туттарбыттар. Бу бырагыраама бастайааннай өрүккэ ыытылла туруоҕун эттэ.

Анал байыаннай дьайыыга сылдьан бааһырыыны ылбыт сулууспалаах дьиэ кэргэнин кытта социальнай хантыраак түһэрсиллэр, ону тэҥэ СВО кыттыылаахтарыгар сир учаастага бэриллэр.

Бары муниципальнай оройуоннарга уонна куораттарга  «#МЫВМЕСТЕ» штаб үлэлиир. Онно былырыын араас кыһалҕаны быһааттарар ис хоһоонноох 6 тыһ. кэриҥэ сайаапка киирбит.  

Саха Өрөспүүбүлүкэтэ шефтэһэр ДНР Докучаевскай куоратыгар 2025 сылга 10 эбийиэккэ үлэ түмүктэммит. Бэс ыйын 8 күнүгэр Оҕо уонна эрдэҕэс оҕо айымньытын дьиэтэ саҥардыллан, үлэҕэ киирбит.  Аҕа дойду көмүскэлин сылыгар Аҕа дойду Улуу сэриитин кэмигэр Донбасс куораты көмүскээбит сэбиэскэй буойуттар көмүс уҥуохтара көмүллүбүт сирин тупсаран биэрии ыытыллыбыт.

Иһитиннэриитин Ил Дархан: “Байыастарбытыгар бары өттүттэн көмөлөһөр өйөбүлбүтүн тохтоппоппут, туох кыаллары барытан оҥоро туруохпут. Аҕа дойду көмүскэлигэр сылдьар дьоммутугар ис сүрэхтэриттэн көмөлөһөн, кыайыыны уһансар бары кэллиэгэлэрбэр, өрөспүүбүлүкэ бары олохтоохторугар махтанабын”, –  диэнинэн түмүктээтэ.