Саха политехническэй лицейгэ салҕааһын үлэҕэ киирдэ

Балаҕан ыйын 1 күнүгэр Дьокуускай куоракка Саха политехническэй лицей салҕааһынын үөрүүлээхтик арыйыы буолла. Бэлиэ тэрээһиҥҥэ Ил Дархан Айсен Николаев, куорат баһылыгын солбуйааччы Владимир Аржаков, Куорат Дууматын бэрэссэдээтэлэ Альберт Семенов, «Арктик Капитал» ХЭТ салайааччыта Матвей Евсеев кыттыыны ыллылар.

5500 кв.миэтэрэ кэриҥэ иэннээх саҥа куорпус «Ыччат уонна оҕолор» национальнай бырайыак иитинэн олоххо киирдэ. Ил Дархан Айсен Николаев бэлиэтээбитинэн, дириэктэр Надежда Тимофеева салалтатынан лицей үөрэх инновационнай өрүтүгэр сүҥкэн болҕомтону уурар. Чуолаан лицей оҕолорго базовай билиини биэрэрин таһынан, идэҕэ бэлмниир. «Бу көннөрү оскуола буолбатах, аныгы элбэх хайысхалаах үөрэхтээһин кластера», – диэтэ Айсен Николаев.

Саҥа дьиэ өйдөбүнньүк күлүүһүн тутууну ыыппыт «Арктик Капитал» тэрилтэ тэрийээччитэ Матвей Евсеев туттарда.

Бэлиэтээн эттэххэ, Саха Өрөспүүбүлүкэтигэр «Үөрэҕирии» нацбырайыак иитинэн хаһан да буолбатах элбэх оскуола уонна уһуйаан тутуллубута. Ол курдук 2018 сылтан 2025 сылга диэри Саха сиригэр 169 үөрэх тэрилтэтэ тутуллубута – дойду салалтата үүнэр көлүөнэҕэ кыһамньытын көстүүтэ. Дойду баһылыга Владимир Путин көҕүлээбит саҥа «Ыччат уонна оҕолор» национальнай бырайыага бу тэтими өссө күүһүрдэр.

Эбэн эттэххэ, быйылгы үөрэх дьылын Дьокуускай куораттааҕы Саха-корейскай уонна С.Г. Черных аатынан 16 №-дээх оскуолалар  «Оскуола үөрэҕин систиэмэтин модернизациялааһын» федеральнай бырайыагынан хапытаалынай өрөмүөннээх көрүстүлэр.

Ааспыт нэдиэлэҕэ куорат баһылыга Евгений Григорьев бэлиэтээбитинэн, үс сыл иһигэр бу бырагырааманан Дьокуускай куоракка 26, ол эбэтэр куорат оскуолаларын аҥаардара өрөмүөннэммит. Эбии саҥа оскуолалар тутуллалларын учуоттаатахха, хапытаалынай өрөмүөҥҥэ наадыйар оскуола ахсаана лаппа аҕыйаабыт.