Саха политехническай лицей оҕолоро Арассыыйатааҕы күрэххэ ситиһиилэннилэр

Дьокуускайдааҕы политехническай лицей үөрэнээччилэрин "Сайсары" хамаандата  "Техно-вызов: инженеры будущего" инженернэй дисциплиналар Бүтүн Арассыыйатааҕы күрэхтэһиилэрин финалыгар III миэстэни ылары ситистэ.
Күрэхтэһии уопсайа 7 хайысханан, 6-с кылаастан 10-ска диэри кылаастары хабан, ыытылынна. Манна оҕолор мобильнай робототехникаҕа, аддитивнай технологияларга, бырагыраамалааһыҥҥа, ону тэҥэ муодаҕа билиилэрин көрдөрдүлэр.
Бу Арассыыйатааҕы күрэхтэһиигэ 23 регион 55 оскуолатыттан уопсайа 279 үөрэнээччи кэлэн кытынна. Саха сириттэн үс оскуола: Майатааҕы лицей, Удачнайдааҕы 24-с №-дээх орто оскуола уонна Саха политехническай лицей хамаандалара.
Ол курдук, "Матырыйааллары механическайдык обработкалааһын" хайысхаҕа күрэх регионнааҕы түһүмэҕин кыайыылаахтара – СПЛ икки хамаандата кыттыбытыттан, "Сайсары" хамаанда (6-7-с кыл.): Ващенко Айтал, Никандров Станислав уонна Степанов Ариан (сал. П.П. Васильева) бочуоттаах III миэстэни ыллылар. Оттон "Эрэл" хамаанда (8-9-с кыл.): Максимов Далан, Козлов Ньургун уонна Макаров Арсений (сал. А.Г. Степанов) IV миэстэҕэ тахсан, үчүгэй көрдөрүүлэннилэр.
Ити курдук оҕолорбут дойду күүстээх хамаандаларын түмпүт күрэххэ дьоһуннук кыттан, үтүө түмүгү ситистилэр.
Бу туһунан Дьокуускайдааҕы үөрэҕирии управлениета телеграм-каналыгар суруйда.

 Хаартыска: Дьокуускайдааҕы үөрэҕирии управлениетын телеграм-каналыттан