Саха оҕото Путинныын көрсүөҕэ

Настя Александрова Арассыыйа биэс талыллыбыт үөрэнээччитин иһигэр киирэн, бүгүн буолар  пленарнай мунньахха кыттыаҕа. Манна Арассыыйа бэрэсидьиэнэ Владимир Владимирович Путины сэргэ Узбекистан, Танзания бэрэсидьиэннэрэ, КНР бэрэссэдээтэлин солбуйааччы Хань Чжэн, Саудовскай Аравия энергетикатын миниистирэ Абдулазиз бен Сальман кыттыыны ылаллара биллэр. 

Саха оҕолорун делегацията бэс ыйын 3-6 күннэригэр буола турар XXIX ПМЭФ кыттыылаахтара буолла. “Каадыр кыаҕын уонна бырайыактаах салайыы киинэ” автономнай кэмиэрчэскэйэ суох тэрилтэ (дириэктэр А.Г. Харитонова) салалтатынан, бырайыактыыр үлэҕэ ураты ситиһиилэрин иһин сүүмэрдээһини ааспыт, Саха сирин бастыҥ үөрэнээччилэрэ Хаҥаластан, Амматтан, Чурапчыттан уонна Дьокуускайтан талыллыбыттар.  

Настя Александрова территориялары сайыннарыы уонна эрэгийиэннээҕи туризм хайысхатынан бырайыактыыр үлэнэн утумнаахтык дьарыктанар, оскуола бастыҥ, барыга бары көхтөөх үөрэнээччитэ.

“ПМЭФ.Юниор” секция иитинэн оскуола үөрэнээччилэрэ профильнай санаа атастаһыыларыгар кытталлара уруккуттан баар көстүү. Бу форумҥа оҕолор креативнай индустрия салаатыгар сайдар кыахтары – муода, киинэ эйгэтиттэн саҕалаан медиа хайысхаларга тиийэ, идэни талыы, настаабынньыктар суолталарын, финансовай култуураны тарҕатыы, о.д.а. туһунан ырытыылаах кэпсэтиилэргэ кыттыһыахтара. Сүрүн болҕомто билиҥҥи ыччат карьератын салайар араас хайысхаларга, ньымаларга ууруллуоҕа. Оҕолор бу көрсүһүүлэртэн сомсор билиилэрин инникитин бырайыактыыр үлэлэригэр туһаныахтаахтар.

Саха сирин үөрэнээччилэрин делегацията “Контент” Экспертнэй-аналитическай пуонда ыҥырыытын тутан, маннык далааһыннаах тэрээһиҥҥэ кыттар кыахтаммыт.

Бэлиэтээн эттэххэ, 2022 сылтан Саха сириттэн 40-ча оскуола үөрэнээччитэ ПМЭФ, ВЭФ, “Точка Летово”, о.д.а.  дойду улахан стратегическай былаһааккаларыгар кыттан турар.