Саха киинэтэ саҥа рекорду үктээтэ

Ааспыт сылга саха киинэтэ холбоон 280 мөл. солк. киллэрэн, 2024 сылга бэлиэтэммит 150 мөл. солкуобайдаах рекорд куоһарыллыбыт.

Ол курдук, 2025 сылга саха киинэтин 500 тыһ. кэриҥэ киһи көрбүт. Оттон  саамай элбэх харчыны «Кончится лето», «Диодорова», «Айхал», «Спид Стар» уус-уран киинэлэр киллэрбиттэр.

«Саха киинэтэ» диэн өйдөбүл үөскүөҕүттэн араас таһымнаах бэстибээллэртэн режиссердар 378 наҕарааданы, ол иһигэр 103 тас дойдулар бириэмийэлэрин аҕаллылар.

Оҥоһуллар киинэни нэһилиэнньэ харгыһа суох көрөрүн өрөспүүбүлүкэни таһынан Арассыыйа араас регионнарыгар, ол иһигэр ДНР өрөспүүбүлүкэтигэр 77 киинэ саалатын тэрийбит «Экстра Синема» диэн бырайыак хааччыйар. 2025 сылга маны сэргэ Индия Janta Cinema хампаанньатын кытта аҕыйах нэһилиэнньэлээх пууннарга киинэ саалаларын тэрийэр туһунан кэпсэтиилэр ыытыллыбыттара.

Ааспыт сыл биир улахан ситиһиитинэн Amazon Prime Video бөдөҥ платформа саха режиссёра Степан Бурнашёв түөрт киинэтин прокакка ылбыта буолар — «Чёрный снег», «Наша зима», «Проклятие. Мёртвая земля» уонна «Айта». Бу киинэлэри Европа, Хотугу Америка уонна Австралия олохтоохторо көрүөхтэрэ.

2020 сылтан өрөспүүбүлүкэ бүддьүөтүттэн киинэ салаатыгар субсидия көрүллэр. Ааспыт алта сылга 45 бырайыак 125,3 мөл. солк. суумалаах көмөнү ылбыт. Дойду баһылыга Владимир Путин 2025 сыл түмүгүнэн пресс-конференциятыгар Арассыыйа Дьоруойа Андрей Григорьев - Тута туһунан киинэни устууга өйөбүл оҥоһуллуон туһунан эппитэ.

2026 сылга Дьокуускайга тутуллуохтаах сылы эргиччи үлэлиир киинэ павильонун бырайыак-смета докумуонун федеральнай өйөбүл суотугар оҥорор туһунан быһаарыы ылыллан турар, диэн Ил Дархан уонна Бырабыыталыстыба пресс-сулууспата иһитиннэрэр.