Саха киинэтэ дойду таһымыгар дьоһун миэстэни ылар

Саха Өрөспүүбүлүкэтин Ил Дархана Айсен Николаев киинэ үлэһиттэрин уонна бэтэрээннэрин эҕэрдэлээтэ. Итиэннэ саха киинэтэ Арассыыйаҕа дьоһун миэстэни ыларын, кэнники сылларга биһиги киинэлэрбит дойду уонна норуоттар икки ардыларынааҕы таһымнаах  бэстибээллэргэ 400-тэн тахса наҕарааданы ылбыттарын бэлиэтээтэ.

Ил Дархан иһитиннэрбитинэн, 2025 сылга Саха сирин киинэлэрэ каассаҕа хомуйбут үптэрэ 280 мөлүйүөн солкуобайга тиийэн, рекорд олохтоммут.  Көрөөччү уопсай ахсаана 600 тыһыынчаттан тахсыбыт, оттон киирбит үп бэһис өлүүтэ Арассыыйа атын эрэгийиэннэригэр тиксэр. Бу саха киинэтэ бүтүн дойду таһымыгар тахсыбытын туоһулуур.

Манна даҕатан эттэххэ, «Сахафильм» судаарыстыбаннай хампаанньа өйөбүлүнэн быйыл улахан экраҥҥа 9 саҥа уус-уран киинэ уонна биир документальнай хартыына тахсара күүтүллэр. Уопсайа 2026 сыл устата 27 саха киинэтэ прокакка тахсыахтаах.

Айсен Николаев билигин биһиги киинэбит иннигэр саҥа саҕахтар арыллалларын бэлиэтээтэ. Итиэннэ Саха сирин бырайыактара норуоттар икки ардыларынааҕы платформаларга уонна бөдөҥ киинэ ырыынактарыгар тахсалларын, Азия, Чуумпу далай эрэгийиэннэрин дойдуларын кытта бииргэ үлэлэһии кэскилэ кэҥиирин чорботто.

Ил Дархан 2026 сыллааҕы бөдөҥ тэрээһиннэртэн IX төгүлүн ыытыллар Дьокуускайдааҕы норуоттар икки ардыларынааҕы киинэ бэстибээлин, «Чыпчаал» киинэ бириэмийэтин уонна «Республика Кино» диэн кылгас кээмэйдээх киинэлэр бэстибээллэрин ааттаата.
Айсен Николаев иһитиннэрбитинэн, Арассыыйаҕа Норуоттар сомоҕолоһууларын, Саха Өрөспүүбүлүкэтигэр Култуура сылларыгар Арассыыйа сэттэ эрэгийиэнигэр «Экстра Синема» ситим 95 киинэ саалата арыллыбыт. Киинэ ситимин бибилэтиэкэтигэр 355 киинэ баар.