Саха-кэриэй оскуолата «Өксөкүлээх сардаҥата» аахсыйаҕа кыттыста

Кулун тутар 16 күнүгэр саха норуотун уһулуччулаах уола, сырдатааччыта, саха суругунан литературатын төрүттээччи Алексей Елисеевич Кулаковскай-Өксөкүлээх Өлөксөй төрөөбүт күнэ бэлиэтэнэр.

Бу дьоро күнү көрсө сылын аайы «Өксөкүлээх сардаҥата» диэн норуот аахсыйата үгэс быһыытынан ыытыллыбыта хаһыс да сыла. Аахсыйа чэрчитинэн үөрэх, култуура тэрилтэлэрэ, уопсастыбаннай тэрээһин кэлэктииптэрэ бу күн чүмэчи уматан духуобунай лидер санааларын, этиилэрин ырытыһар тэрээһиннэри ыыталлар.

Быйылгы аахсыйаҕа Дьокуускай куорат оскуолалара көхтөөхтүк кытыннылар. Кинилэртэн бастакынан Саха-кэриэй оскуолата «Өксөкүлээх сардаҥатын» уматта.

Аахсыйа СӨ бастакы бэрэсидьиэнэ Михаил Николаев көҕүлээһининэн олохтоммута. Кини Алексей Кулаковскайы олоҕун бүтүннүү бэйэтин норуотугар анаабыт, омугу түмэр, казахтарга Абай, индустарга Ганди, кытайдарга Конфуций уо.д.а. кэриэтэ холобур буоларын,  «Өксөкүлээх – өрөспүүбүлүкэбит символа, саха омугу түмээччи» диэн  бэлиэтээн эппитэ.

Быйылгы аахсыйа чэрчитинэн тэрээһиннэр А.Е. Кулаковскай олоҕун сырдатар СӨ бастакы Бэрэсидьиэнэ М.Е. Николаев пуондата бэлэмнээбит «Путь в вечность» кылгас метражтаах документальнай киинэни көрдөрүүттэн саҕаланнылар.

Николаев-Киинин салайааччытын солбуйааччы Анна Захарова оҕолорго Михаил Ефимович олорон ааспыт олоҕун, үлэтин-хамнаһын сырдатта, кини көҕүлээһининэн «Путь в вечность» киинэ хайдах оҥоһуллубутун, 90-с сылларга Михаил Николаев азия норуоттарын тылларын билэр исписэлиистэри бэлэмнээһини инники күөҥҥэ туппутун кэпсээтэ. Онон сиэттэрэн өрөспүүбүлүкэҕэ инновационнай оскуолалары арыйыыга эксперименниир бырайыак бигэргэнэн, Саха-кэриэй оскуолата тэриллэригэр тирэх ууруллубут.

Киинэни көрүү кэннэ көхтөөх ырытыһыы буолла, оҕолор үгүс-элбэх саҥаны билбиттэрин бэлиэтээтилэр, салгыы төрөөбүт дойдуларын историятын, биллиилээх дьонун олохторун үөрэтэр санаалаахтарын үллэһиннилэр.

 Николаев-Киинин иһитиннэриитинэн.