Саха көрөөччүтэ саҥа сериаллары кэтэһэр

“Сиэгэн суолун хайан” детектив тахсыаҕа

Режиссер Елена Эверстова "Сиэгэн суолун хайан" сериал артыыстарын кытта

Быйыл «Сиэгэн суолун хайан» диэн драма уонна детектив хабааннаах сериал тахсыаҕа. Билигин тыаһа-ууһа, уота-күөһэ цветокоррекцията оҥоһуллан эрэр. Киинэҕэ уопуттаах силиэдэбэтэл Алексей Охотин Дьокуускайга хас да кыыс сүппүтүн чинчийэн, буруйданааччы суолун ирдиирин туһунан кэпсэнэр.

Сериал режиссера — Елена Эверстова. Көрөөччү кинини «Мин таптыыр спутнигым», «Харчы», «Уот Дьулустаан» сериалларынан билэр. Сценарий ааптара — Евгения Давыдова, кинини биһиги «Тумарык», «Харчы» сериаллар уонна киэҥ экраҥҥа тахсыбыт «Харчы. Иэстэбил» киинэ сценарийдарын суруйбутунан билэбит.

Сценарист, “Саха” НКИХ Сериаллары бэлэмниир сулууспатын продюсера Евгения Давыдова:

— Икки сериалы (“Тапталы эрэйэр сүрэхтэр” уонна “Сиэгэн суолун хайан”) — саҥа дьылга диэри, саҥа дьыл кэннэ өссө икки саҥа сериалы (“Күрүлгэн”, “Сүрэх ыллыыр, сүрэх ытыыр”) таһаарыахпыт.

Өссө да атын киинэлэргэ сценарийдар сурулла сылдьаллар. Биир сериал устуута күһүн саҕаланыахтаах. Көрөөччү сэргиирин тухары биһиги үлэбит тахсыылаахтык, айымньылаахтык баран иһэр.

Сериал сценарийа, син биир дьахтар иһигэр киһини үөскэтэрин курдук, ортотунан 9 ый кэриҥэ суруллар эбит. Салгыы бэлэмнэнии үлэтигэр 2-3 ый барар, устуута 3-4 ый буолар. Монтаж, цветокоррекция, тыас-уус таҥыыта 2-3 ый буолар. Ол аата биһиги, көрөөччүлэр, күн аайы кэтэһэн-манаһан, хас биирдии серия кэннэ ырытыһан, дьоруойдарбытыгар ис сүрэхпититтэн ыалдьан көрөр киинэлэрбит ортотунан балтараа сыл устата барар күүстээх үлэ кэннэ “төрүүллэр”.

“Сиэгэн суолун хайан” киинэм дьиҥнээх олоххо олоҕурбат. Кырдьыкка олоҕуран суруйуу бары өттүттэн наһаа үрдүк ирдэбиллээх. Ол иһин өйтөн суруйбут табыгастаах. “Дьиҥнээх олоххо олоҕуран” диэтиҥ да, киинэ локацията, ол аата экраҥҥа көстөр сирэ-уота, дойдута, дьоруойдарыҥ тас көстүүлэрэ, майгылара-сигилилэрэ, буолбут түбэлтэ ымпыга-чымпыга барыта дьиҥнээх олоххо буолбукка күүскэ майгынныыр буолуохтаах. Оттон биһиги көрөөччүлэрбит наһаа үрдүк ирдэбиллээхтэр, сериал дьоруойдарын бу чугас ыалларын курдук ылыналлар. Ол иһин дьоруойдар тутталларыгар-хапталларыгар, саҥаларыгар-иҥэлэригэр, идэлэрин эйгэтигэр сөп түбэһэн саҥаралларыгар о.д.а. барыта кырдьыктыы буолан көстүөхтээх. Ол иһин биһиги, сценаристар, хайаан да консультаннары булан, кинилэри кытта ыкса үлэлиибит. Оччоҕо эрэ дьоҥҥо итэҕэтэр историялар, кэпсэтиилэр, түбэлтэлэр, диалогтар суруллан тахсаллар.

“Сиэгэн суолун хайан” жанра детектив, драма. Сценарийын былырыын суруйбутум. Устуута былырыын күһүн, кыһын уонна быйыл саас буолбута. Бу сериалга элбэх идэтийбит артыыс оонньоото, бары атын сүрүн үлэлээх, соччо иллэҥнэрэ суох дьон. Сүрүн үлэлэрин быыһыгар эрэ уһуллаллар. Оннукка сьемка бириэмэтэ уһаан биэрэр. Сайын уоппуска кэмигэр холкутук уһуллуу сорохторго табыллыбат.

Сүрүн оруоллары Үүнэр көлүөнэ тыйаатырын артыыстара Айталина Яковлева, Владимир Охлопков, Федот Львов, Екатерина Хоютанова, Саха тыйаатырын артыыстара Кирилл Семенов, Айаал Аммосов оонньоотулар. Ону тэҥэ саҥа ааттар эмиэ бааллар.

Режисер Елена Эверстовалыын бу үһүс үлэбит. Көрөөччүбүтүгэр анаан кыһаллан, туох баар күүспүтүн, сырабытын ууран туран бары хамаанданан үлэлээтибит.

Өссө ханнык сериаллары кэтэһэбит

Медиа Хилс рейтинг оҥорор агентство туоһулуурунан, сахалыы сериал тахсар кэмигэр өрөспүүбүлүкэ ханаалын көрүүтэ атын федеральнай теле-ханааллары ырааҕынан куоһарар. Киинэ дьоруойдарын дьылҕалара чугастааҕы ыал олоҕун-дьаһаҕын курдук көрөөччүнү долгутар.

"Тапталы эрэйэр сүрэхтэр" сериал хамаандата артыыстары кытта.

Бу саас уһуллубут «Тапталы эрэйэр сүрэхтэр» сериал билигин таҥылла сылдьар. Дэриэбинэ атаах кыыһа Кыыдаана дьонун кытта кыыһырсан баран куоракка аҕам саастаахтар пансионаттарыгар үлэлии киирэр. Бу киинэ сценарист Сайаана Эверстова бастакы айар дебюта. Эдэр режиссер Ярослав Касьянов «Айкуо» сериалы устубута. Сериалы Саха тыйаатырын биллиилээх артыыстара Анатолий Николаев, Маргарита Борисова, Надежда Ущницкая, Зоя Попова, Михаил Апросимов киэргэттилэр.

"Күрүлгэн" сериал уһуллуутун кэмигэр.

90-с уонна 2000-с сыллар туһунан икки сериал эһиил көрөөччү дьүүлүгэр тахсыахтаах. Дойду үрдүнэн тосту уларыйыы кэмигэр алта доҕоттор оскуоланы бүтэрэн, устудьуоннуу киэҥ сиргэ киирэллэр. «Күрүлгэн» («Водоворот») сериал режиссера Марина Барашкова («Олох оҥочото», «Иччитэх дьиэ»), сценарист – Катерина Григорьева-Кэрэмэс Сыдьаай («Хирурдар», «Уот Дьулустаан»). Бастакы сериялары Хаҥалас улууһугар Уулаах Ааҥҥа уонна Булгунньахтаахха уһуллулар.

Саха кыыһа уонна казах уолун истиҥ тапталлара «Сүрэх ыллыыр, сүрэх ытыыр» диэн сериалга кэпсэниэхтээх. Режиссера Марина Платонова («Хирурдар», «Айааловна»), сценарийын Дана Сард («Аламай таас», «Иччитэх дьиэ») суруйда. Икки омук култууратын алтыһыыта уонна уҕараабат таптал туһунан киинэ Норуоттар сомоҕолоһууларын сылыгар ананар.

***

Санатан эттэххэ, “Саха” НКИХ сериалларын тэлэбиисэринэн көрөрбүт таһынан мобильнай сыһыарыытыгар уган иһэллэрин эмиэ көрүөххэ сөп. Сыһыарыыга киинэ серията биир күн хойутаан угуллааччы.