«Саха Инновации-2025»: бастыҥы таллылар

Туймаада ыһыаҕар Арассыыйаҕа Саҥаны айааччы уонна рационализатор күнүн көрсө «Саха Инновации» өрөспүүбүлүкэтээҕи быыстапка ыытылынна.

Бу үгэс буолбут тэрээһин Саха сирин үрдүнэн научнай-тэхиньиичэскэй толкуйдары, бастыҥ саҥаны киллэриилэри киэҥ араҥаҕа көрдөрөр, сырдатар соруктаах тэрийиллэр, диэн СӨ Ил Дарханын уонна Бырабыыталыстыбатын пресс-сулууспата иһитиннэрэр.

Быйылгы быыстапка бастыҥ инновациятынан М.Г. Сафронов аатынан Дьокуускайдааҕы тыа хаһаайыстыбатын научнай-чинчийэр институтун «Биогельм» бырайыага ааттанна. Бу – үөрдээн иитиллэр сылгыга үөскүүр паразиттары утары охсуһарга анаан оҥоһуллубут аһылык эмп булкааһыга. Булкааһык көдьүүһэ үрдүк уонна Уһук Хоту сир усулуобуйатыгар сылгыны иитии тоҕоостоох соруктарын быһаарар кыахтаах.

Итини таһынан «Бастыҥ муниципальнай бырайыактар» ааты Эбээн Бытантай улууһун «Дары Бытантая» көҕүлээһинэ уонна Нерюнги оройуонун «Кванториум» технология пааркатын лабораторията ыллылар.

«Бастыҥ көх» номинацияҕа Сбербаан «Школа 21» үөрэтэр бырайыага тигистэ. Оттон бастыҥ тас көрүҥү (оформлениены) «MEDICRYOT» бренд сэппэрээктэн оҥорбут бородууксуйатыгар көрдөрдө. «Прорыв года» – үтүө санаанан оҥоһуллар көмөнү автоматическайдык хомуйарга толкуйдаммыт «PODARUM» онлайн сервис. «Выбор организаторов» номинацияҕа модульнай протезтарынан кыттыбыт «AUGMETIC» хампаанньа кыайда. «Норуот билиниитэ» ааты Саха сирин дьахталларын, ийэлэрин хамсааһыннарыгар иҥэрдилэр.

Быйылгы Ийэ дойдуну көмүскээччи сылыгар ыытыллыбыт быыстапка байыаннай сулууспалаахтары өйүүргэ кылааты киллэрэр Саха сирин  олохтоохторугар эмиэ ананна. СӨ Бырабыыталыстыбатын бэрэссэдээтэлин солбуйааччы Анатолий Семенов быыстапкаҕа сүрүн экспозицияҕа анал байыаннай дьайыы кыттыылаахтарыгар көмөлөһөргө туһаайыллыбыт бырайыактар  турбуттарын бэлиэтээтэ. Кини манна көрдөрүллүбүт технологиялар ааптардара инженернэй бэлэмнэрин таһыма үрдүгүн, дириҥ социальнай эппиэтинэстээхтэрин тоһоҕолоото. 

Ол курдук, «Илии сылааһа» дьахталлар, ийэлэр хамсааһыннара оҥорон таһаарбыт бородууксуйалара дьон болҕомтотун тарта. Бу хамсааһын кыттыылаахтара анал байыаннай дьайыы саҕаланыаҕыттан биир күн өрөөбөккө, байыаннай сулууспалаахтарга анаан хаачыстыбалаах, функциональнай экипировканы тигэллэр, Ийэ дойдуну көмүскээччилэри өйүүргэ бигэ кылааты киллэрэллэр. 

Хаартыскалар: СӨ Ил Дарханын уонна Бырабыыталыстыбатын пресс-сулууспата