Саха гимназиятын 11-с кылааһын үөрэнээччитэ Дублер күнүгэр кытынна

Дьокуускай уокуруктааҕы дьаһалтатыгар Олохтоох бэйэни салайыныы күнүгэр анаан «Дублер2 дьыалабыай оонньуу буолан ааспыта. Манна Саха гимназиятын бэйэни салайыныыга кэмитиэтин салайааччыта Дьулустаан Корнилов дьаһалта баһылыгын солбуйааччы дублера буолбута.

Дьулустаан бу оонньууга кыттыбытын туһунан санаатын бу курдук үллэһиннэ: «Бу тэрээһин олохтоох бэйэни салайыныы уорганнара суол үлэтигэр, тырааныспарынан хаччыйыыны тэрийиигэ, атыы-эргиэн, урбаан уонна тыа хаһаайыстыбатын сайыннарыы эйгэлэригэр ыытар үлэлэрин иһиттэн көрөргө ураты кыаҕы биэрдэ. Владимир Евгеньевич Дорожкин, уопуттаах уһуйааччы быһыытынан, бэйэтин билиитин уонна тоҕоостоох боппуруостары хайдах быһыылаахтык быһаарары үллэһиннэ. Хас биирдии эйгэҕэ кэллиэгэлэр уонна гражданнар интэриэстэрин учуоттуур наадалааҕын уонна уопсай соругу ситэргэ араас сулууспалар икки ардыларыгар сөптөөх хардарыта сыһыаны олохтууру көрдөрдө.

Ордук куораппыт сааскы кэмҥэ көрсөр кыһалҕаларын дириҥник ырытан өйдүүрэ сөхтөрдө. Олохтоох дьон санаатын болҕойуу уонна суол инфраструктуратын сайыннарыыны экология туругун харыстааһыны кытта сөптөөхтүк тэҥҥэ тутуу дьоһун суолталааҕын өйдөөтүм. Маны таһынан, бу күн Суол инфраструктуратын уонна тырааныспар департаменын бэрэстэбиитэллэрин кытта элбэхтик көрүстүбүт, онно ыытыллыбыт ыллыктаах кэпсэтиилэри уонна кэккэ боппуруостары бииргэ быһаарыылары кэтээн көрөр кыахтанным. 

Дублер күнэ миэхэ туһалаах уопут эрэ быһыытынан буолбакка, инники олохпор күүрээннээх көҕүлээһин төрүтүнэн буолла. Дьыалабыай оонньуу тэрийээччилэригэр уонна чуолаан Владимир Евгеньевичкэ өйөбүлүн уонна туһалаах сүбэлэрин иһин барҕа махталбын этэбин. Маннык хабааннаах көҕүлээһиннэр ыччат гражданин быһыытынан олоххо көхтөөх сыһыанын уонна Дьокуускай куораппыт сайдыытын көҕүлүүллэригэр бигэ эрэллээхпин».

Хаартыска: Үөрэҕирии управлениетын телеграм-ханаалыттан