«Саха быһаҕа» күрэххэ «буруолуу сылдьар» быһах бастаата

«Кыһын Саха сириттэн саҕаланар» бэстибээл чэрчитинэн быйыл бастакытын ыытыллыбыт «Саха быһаҕа» тимир уустарын куонкуруһугар кыттааччылар көрдөрөр быһахтарынан үгүс тургутугу аастылар: мууһу көйдүлэр, маһы кыстылар, боолдьоҕу быстылар, ол кэннэ тоҥ балыгы кыһан баран бүтэр уһугар кумааҕыны быһан быһах кылаана кыларыйбатаҕын көрдөрдүлэр.

Күрэх түмүгэр кыайыылааҕынан бадаайы быһахтаах Мэҥэ Хаҥалас улууһун тимир ууһа Николай Костромин буолла. Николай санаатын үллэстэригэр тимир ууһун быһыытынан үһүс сылын дьарыктанарын эттэ. Бу охсуу үөстээх, чубуку киллэһиктээх, халтарыйбат уктаах быһаҕын күрэс буолар күнүгэр бүтэрэн, «буруолуу» сылдьар оҥоһугун куонкуруска сүрэхтээбитин долгуйа кэпсээтэ.