Саха бастакы комедиограбын үйэтитэр киинэ уһуллан эрэр

2022 сыллаахха Күлүмнүүр бириэмийэтин лауреата буолбут Иван Кривогорницын бу киинэтин иккис сылын устар. Былырыын саха суругунан литературатын төрүттээччилэртэн биирдэстэрэ, биллиилээх комедиограф, драматург, кэпсээнньит Николай Денисович Неустроев төрөөбүтэ 130 сыла буолбута. Онон киинэ суруйаачы олоҕун, айар үлэтин сырдатар аналлаах. Дьыл түөрт кэмэ барыта сценарийга баар буолан, икки сыл устата уһуллар киинэ буолбут.

Суруйааччы аатын сүгэр Уус Таатта орто оскуолатын коллектива, иитэр үлэҕэ директоры солбуйааччы Анна Софроновна Кочнева сүрүннээһининэн, Норуот айымньытын дьиэтин салайааччы Варвара Ананьевна Максимова, кыттар оҕолор төрөппүттэрэ тирэх буола, көмөлөһө сылдьаллар.

Гизелла Попова, СӨ историктарын уонна кыраайы үөрэтээччилэрин сойууһун чилиэнэ, СӨ Үөрэҕириитин туйгуна. Э.К. Пекарскай аатынан Игидэй орто оскуолатын педагог-библиотекара: “Икки сиэним киинэҕэ уһулуннулар - Ян Захаров уонна Гизелла Попова - иккис кылааһы  бүтэрдилэр.

Саас киинэ уһулла сылдьарын туһунан олус сэргии истибитим. Бэйэм улуус кыраайы үөрэтээччилэрин түмсүүтүгэр баарбын уонна Саха Өрөспүүбүлүкэтин устуоруктарын уонна кыраайы үөрэтээччилэрин сойуустарын чилиэнэ буолабын, ол иһин миэхэ маннык хамсааһын олус интэриэһинэй.

Таатталар суруйааччы үбүлүөйдээх сылынан тэрээһин бөҕөтүн ыыттылар. Чинчийэр үлэлэргэ ааҕыылар буолбуттара. Ол курдук, Э.К. Пекарскай аатынан Игидэй орто оскуолатын үөрэнээччилэрэ Вика Афанасьева, Айта Захарова Н.Д. Неустроев Оруоһуттар аймаҕы кытта сибээһин туһунан дакылаат суруйбуттара. Оттон Лира Аргунова биллиилээх суруналыыс, учуонай И.А. Аргунов үс реалист-суруйааччылар литературнай нэһилиэстибэлэрин харыстыырга үлэлэспитин туһунан чинчийэр үлэни оҥорбута. Ити курдук классик суруйааччы үлэтин үөрэтэр, чинчийэр, үйэтитэр үлэлэргэ кыттыһа сатыыбыт.

Бу сырыыга икки сиэммин аҕалан киинэ уһуллуутугар кытыннардым. Оҕолор олус сөбүлээтилэр. Ытык Күөллээҕи “Таатта”  литературнай-художественнай түмэл-заповеднигар сырыттылар. Былыргы оскуоланы көрдүлэр-иһиттилэр. Режиссер Иван Юрьевич сүбэтин, этиитин ылынан камера иннигэр үлэлии үөрэннилэр, артыыс идэтин билистилэр.

Бүгүн суруйааччы Н.Д. Неустроев күн сирин көрүүтүн, 3-4 саастаах кэмин, оскуолаҕа үөрэнэ киириитин, И.О. Ребицкэй кыттыылаах сценаларын уһуллулар".

***

Биллиилээх режиссер Тааттаҕа 6 күн үлэлиир. Бастакы күн Чөркөөх түмэлигэр үлэлээбит. 2-3 күннэригэр Ытык Күөл түмэлигэр, онтон Уус Тааттаҕа үлэлииллэр. Онтон Н.Д. Неустроев олорбут, үлэлээбит сирдэригэр Баайаҕаҕа, Уолбаҕа тиийэн устуохтаахтар.

Ыспыраапка:

* Иван Кривогорницын  саха көрөөччүтүгэр биллэр киинэлэрэ: «Уhуктуу», «Берега Андрея Борисова», «Суорун Омоллон. Над временем», «Ленск. Возрождение», «Дорога к отцу», «На улице Пушкина», «Якутия. Прощание с веком», «На стыке тысячелетий», «Табык. Монотипия», «Ысыах Победы», «Век якутского кино», «Семён Борисов. Выдающийся сын народа», «Иван Павлов. Воин. Учитель. Летописец», «100 интервью о будущем», «Энгеси из Северной Пальмиры», «Олонхосут», «Ганнибал», «Якутия. Прощание с веком» о.д.а.