Сабыйа: "Сахабыт тыла инникилээх эбит диэн үөрдүм!"

Бу сырыыга бибилэтиэкэҕэ "Киин куорат" хаһыат ыалдьыта, СӨ үөрэҕириитин туйгуна, Арассыыйа үөрэҕириитин бочуоттаах үлэһитэ,  Арассыыйа учууталларын  куонкуруһун  2006 с. Гранын хаһаайката, СӨ Суруйааччыларын сойууһун чилиэнэ Татьяна Ефремовна Винокурова-Сабыйаны кытта көрсүһүү буолбут.

– Кулун тутар 18 күнүгэр Сайсарыга көхтөөх үлэлээх "Маяк" бибилэтиэкэҕэ В.В. Яковлева ыҥырыытынан тиийэн, эдэр сааспар түһэн ыллым. Ол курдук уон биэс сыл буолан баран, толору оҕолоох кылааска саха тылын уруогун эйгэтигэр умсан, уруок биэрдим. Бибилэтиэкэҕэ 18-с оскуола 4-с кылааһын оҕолоро учууталлара Т.П.Антоновалыын мустубуттар. Билиигэ-көрүүгэ чахчы тардыһар, харахтара чаҕылыҥнас, сахалыы саҥалаах, киһилии кэпсээннээх дьон! Аны биир оҕо тосту-туора хамсамматын, бары бэрт сытыары, көрсүө майгылаахтарын бэлиэтии көрдүм. Уруокпут устата биир да оҕо сэмэлэммэтэ. Киһи үтүөнү эрэ эрэнэ кэтэһэр дьоно эбиттэр! Оҕолор төрөөбүт тыл туһунан санааларын этиннилэр. Онтон мин санаам көтөҕүлүннэ! Аны дьиэлэригэр бырааттара, балыстара сахалыы кэпсэтэллэрин истэн, сахабыт тыла инникилээх эбит диэн үөрдүм!

Эдэркээн учуутал кыргыттар оҕолорун бэрт сөпкө иитэ, үөрэтэ сылдьалларыттан бары да астынныбыт. Оҕолорго ситиһиилэри баҕаран,  учууталларга, көрсүһүүнү тэрийбит бибилэтиэкэ үлэһиттэригэр махтанан, сахабыт тыла сайдарыгар, сиэрэ-туома кинилэр ыччаттарыгар тыыннаах тиийэригэр эрэллээх эгди буолан тарҕастыбыт.

"Маяк" ааҕааччыларын маяк буолан ыҥыра, үйэлээх үрдүккэ, сырдыкка угуйа турдун!