Саастарын ситэ илик оҕолору үлэҕэ ылыы стандарта олохтонно

Оҕо дьарыктаах буолуутун сайыннарар сыалтан СӨ Оҕо быраабыгар боломуочунайын көҕүлээһининэн СӨ Нэһилиэнньэ дьарыктаах буолуутугар судаарыстыбаннай кэмитиэтэ 14-тэн 18-гар диэри саастаах оҕолору үлэнэн хааччыйыы стандартын олохтоото.

Ол курдук, СӨ Оҕо быраабыгар боломуочунайа Туйара Васильева бэлиэтээбитинэн, стандарты РФ Бэрэсидьиэнин иһинэн Оҕо быраабыгар боломуочуйалаах Мария Львова-Белованан оҕолор, төрөппүттэр, үлэ сыһыаннаһыыларыгар эспиэрдэр уонна субъектарга оҕо быраабыгар боломуочунайдар этиилэрин учуоттаан оҥорбут.

Бу докумуон сүрүн аналынан үлэни биэрээччигэ сааһын туола илик оҕоҕо үлэ миэстэтин сокуон хараҕынан тэрийэргэ, кини интэриэһин көмүскүүргэ көмөлөһөрө буолар. 

Ол курдук, стандарт сүрүн уонна эбии ирдэбиллэрдээх, үлэ сокуонун билиини бэрэбиэркэлиир ыйытыылардаах илиистээх. Ыйытыыларга хоруйдар түмүктэринэн үрдүк сыанабылы ылбыт тэрилтэлэргэ Нэһилиэнньэ дьарыктаах буолуутугар кэмитиэт стандарт ирдэбилигэр сөп түбэһии туһунан Декларацияны туттарар, оттон тэрилтэ аата эппиэтинэстээх үлэни биэрээччилэр реестирдэригэр киирэр. 

Омбудсмен чахчытынан, 2024 сылга Саха сиригэр дьарыктаах буолуу сулууспатын нөҥүө 3,4 тыһыынча 14-тэн 18-гар диэри саастаах оҕо үлэнэн хааччыллыбыт. Кинилэргэ 500 кэриҥэ тэрилтэ быстах үлэ миэстэтин тэрийбит, ол иһигэр 74 оҕо ыстаадаҕа үлэлээбит. 
2025 сылга дьарыктаах буолуу сулууспатын иһинэн 2 900 оҕону үлэнэн хааччыйар былаан турар. Дьокуускай куоракка сайыҥҥы кэмҥэ үлэлиэн баҕалаах оҕолорго аналлаах дьаарбаҥка ыам ыйын 29 күнүгэр күнүс 14:00-16:00 чч. Оҕо айымньытын дьиэтин тиэргэнигэр ыытыллаары турар, диэн Ил Дархан уонна Бырабыыталыстыба пресс-сулууспата иһитиннэрэр.