Сааспытын саҥа бүлүүдэлэринэн көрсүөххэ!

Үгэспинэн, күндү ааҕааччыларбар бэйэм муспут, астаабыт (сороҕун астыы да илик) сонун ырысыаптарбын бэлэх уунабын. Сааскы бырааһынньыккытыгар, көннөрү да күннэргэ астааҥ, өссө эр дьоҥҥутугар көрдөрөргүт ордук этэ.

«Датский» салаат

Биһиэхэ наада:

• Селедка — 200 г;

• дьаабылыка — 0,5 уст.;

• хортуоппуй — 2 уст.;

• луук – аҥаара;

• сымыыт – 1 устуука.

Саппараапката: оливка арыыта – 1 ост.нь., чөчөгөй – 1 ост.нь., дьаабылыка уксуһа – 1 ост.нь., хартыыһа – 1 ч.нь., саахар – 1 ч.нь., туус, бытархай хара биэрэс – бэйэ сөбүлүүрүнэн.

Астааһына:

1. Хортуоппуйу хахтыы, сымыыты бүтэйдии буһараҕыт, кубиктыы кырбыыгыт. 

2. Селедка балыгы хоһуоччуктуу кырбааҥ.

3. Дьаабылыканы хахтаан баран кубиктыы быһыҥ.

4. Саппараапкатын кутуҥ.

5. Үрдүгэр луугу тиэрбэстии кырбаан баран тэлгэтэн киэргэтэ кутуҥ.

Пекинскэйдии «Цезарь»

Биһиэхэ наада:

• Пекинскэй хаппыыста – аҥаара;

• крабовай — 100 г;

• иэдьэгэйтэн сыр — 100 г;

• чеснок — 1 өлүүскэ;

• суухара — биир ытыс, элбэх да буолуон сөп;

• майонез, биэрэс.

Астааһына:

1. Пекинскэй хаппыыстаны уонна крабовай палочканы синньигэс соломолуу кырбыыгыт.

2. Сыр теркаланар, чеснок эбэҕит.

3. Биэрэстиигит, суухараны эбэҕит, майонезтаан баран остуолга тута бэриллэр, туустаммат.

Муора салаата

Биһиэхэ наада:

• Кальмар — 150 г;

• Крабовай палочка — 250 г;

• кыһыл искэх — 1 бааҥка;

• сымыыт — 8 устуука;

• укроп — 1 тутум;

• туус, биэрэс, майонез— бэйэ сөбүлүүрүнэн.

Астааһына:

1. Кальмары ыраастаан 2-3 мүнүүтэ буһараҕыт.

2. Ол уутугар креветкэни эмиэ 2-3 мүнүүтэ буһараҕыт. Сойутуҥ, ыраастааҥ. Уһуннук оргуттаххытына, кытаанах буолаллар.

3. Крабовай палочканы кубиктыы кырбааҥ.

4. Сымыыт үрүҥүн уһун синньигэс гына, араҥаһын бытархай гына кырбааҥ.

5. Кальмары тиэрбэстээҥ. Миискэҕэ кальмары уонна креветкэни холбооҥ, сымыыккытын уонна кыһыл искэх аҥаарын кутуҥ.

6. Майонеһынан булкуйуҥ, искэххит аҥааарын, укроп кутан киэргэтиҥ.

Кэриэйдии салаат

Биһиэхэ наада:

• Хортуоппуй — 3-4 уст.;

• эт —200-250 г;

• чеснок — 3 өлүүскэ;

• уксус 6 % - 4 ост.нь. (3 ост.нь. хортуоппуйу ууга буһарарга, 1 ост. нь. салаакка);

• соевай соус – 3-4 ост.нь.;

• кориандр – 1 ч.нь.;

• биэрэс арааһа ч.нь. аҥаара.

Астааһына:

1. Оргуйбут ууга туус, уксус кутаҕын.

2. Теркаламмыт хортуоппуйу олох аҕыйах мүнүүтэ көрөн туран кутан оргутаҕыт уонна дуршлакка сүөкүүгүт.

3. Луугу тиэрбэстии кырбаан арыыга ыһаарылыыгыт, кыра гына кырбаммыт эти уонна соевай соус эбэҕит, уоккутун кыччатаҕыт, кориандр, биэрэс эбэҕит.

4. Хортуоппуйга уксус эбэн баран ыһаарыламмыт эккитин кутан булкуйаҕыт.

Черносливтаах крабовай салаат

Биһиэхэ наада:

• Крабовай палочка — 100 г;

• кытаанах сыр — 100 г;

• чернослив — 70 г;

• сымыыт — 2 устуука;

• оҕурсу — 1 устуука;

• майонез;

• күөх тума;

Астааһына:

1. Сыры теркалыыгыт, атынын барытын кубиктыы кырбыыгыт.

2. Черносливы сууйан, ууга туруора түһэн баран аҥаардыыгыт эбэтэр сыалайдыы да кутуохха сөп.

Ынах этиттэн шурпа
(илиҥҥи дойдулар мииннэрэ)

Биһиги бу миини олус сөбүлээтибит, хайдах эрэ ураты амтаннаах, остолобуой дуу, кафе дуу миинин санатар.

Устуукатын, грамын бэйэ сөбүлүүрүнэн, хас киһини аһатаргытынан, саха хараҕынан көрөн уларытыаххытын сөп. Мин, холобур, помидору куппатаҕым, хортуоппуйа эмиэ наһаа элбэх суруллубут, базилик, кинза куппатаҕым. Оттон ырысыабы хайдах баарынан суруйабын.

Биһиэхэ наада:

• Ынах этэ — 1 кг;

• Хортуоппуй — 500 г;

• луук — 3 устуука;

• помидор — 2-3 уст.;

• моркуоп — 2 уст.;

• кыһыл минньигэс биэрэс— 2 уст.;

• чеснок – 4 өлүүскэ;

• мас арыыта – 4-5 ост.нь.;

• томат паастата – 2 ост.нь.;

• лавр сэбирдэҕэ;

• хара биэрэс, базилик, кинза.

Астааһына:

1. Эти кубиктыы кырбыыгыт, 3-4 см гына, моркуобу соломолуу, чесногу илдьиритэҕит.

2. Болгария биэрэһин кубиктыы, луугу тиэрбэстии, помидору эмиэ кубиктыы кырбааҥ.

3. Хортуоппуйу 4 чааска араартааҥ, бөдөҥүттэн көрөн.

4. Мас арыытыгар эти 5-6 мүнүүтэ ыһаарылааҥ.

5. Онно луугу уонна моркуобу эбиҥ, 5 мүнүүтэ ыһаарылааҥ, ол кэннэ биэрэһи, чесногу, томат паастатын кутуҥ.

6. Уугутун дьэ кутаҕыт, 2,5 лиитэрэ диэбиттэр. Туустаан баран 45 мүнүүтэ оргутуҥ.

7. Хортуоппуй, лавр сэбирдэҕэ, базилик кутан баран эмиэ 20 мүнүүтэ оргутуҥ.

8. Лавр сэбирдэҕин хостоон баран 10-15 мүнүүтэ бытааннык тэптэриҥ.

9. Итиилии тэриэлкэлэргэ кутан баран кинза эбиҥ.