09.02.2024 | 16:00

Сааскы күн курдук бүлүүдэлэр

Сааскы күн курдук бүлүүдэлэр
Ааптар: Розалия Томская
Бөлөххө киир

Форель балыктаах, брокколи хаппыысталаах киш

Киш диэн олус тотоойу бөрүөк курдук бүлүүдэ, уратыта диэн үрдүгэр убаҕаһынан саба кутуллар уонна бөрүөк сүрүн чааһын буһарар түбүктээх соҕус.

 

Тиэстэтигэр:

Ынах арыыта – 100 г;

Бурдук – 160 г;

Уу – 40 мл;

Туус – быһах тумсугар.

 

Начыыныгар:

Брокколи хаппыыста – 200 г;

Тууһаммыт форель – 200 г;

Араас тума.

Кытаанах сыыр – 50 г.

 

Үрдүгэр кутарга:

Сүөгэй (сливки 20 %) – 200 мл;

Сымыыт – 2 уст.;

Хара биэрэс.

 

Бурдукпутун сиидэлиибит. Арыыны тууһу уонна бурдугу кытта холбоон, бытархай маасса бэлэмниибит. Онно ууну кута-кута тиэстэ мэһийэбит. Биир чаас холодильникка сынньатабыт.

Сынньаммыт, сойбут тиэстэни икки пергамент илииһин икки ардыгар ууран 3-4 мм халыҥнаах гына тэнитэбит. Формаҕа ууран баран биилкэнэн тэһитэ анньыалыыбыт, 15 мүнүүтэ морозильникка уган кэбиһэбит.

Духуопканы эрдэттэн 170 кыраадыска сылытабыт. Морозильниктан бөрүөкпүт тиэстэтин таһааран, пергамент кумааҕыны ууран, ханнык баҕарар куруппаны эбэтэр гороҕу кутан баттатан баран духуопкаҕа 15 мүнүүтэ буһарабыт. 15 мүнүүтэ ааспытын кэннэ баттыкпытын ылан быраҕабыт уонна бүрүөкпүт форматын бэйэтинэн 15 мүнүүтэ духуопкаҕа угабыт.

Форель этин кубиктыы кырбыыбыт, уҥуоҕуттан ыраастыыбыт. Брокколи хаппыыстаны илиибитинэн өлүүскэлэргэ араартыыбыт, 5 мүнүүтэ ууга оргутан ылабыт, сиидэлиибит, өссө кыччатан биэрэбит, кытаанах чаастарын ылгыыбыт.

Сүөгэйи сымыыты кытта ытыйабыт, тумалыыбыт.

Бөрүөкпүт бэлэмнэммит форматыгар начыыммытын сааһылаан уурабыт, үрдүгэр сүөгэйдээх сүмэһиммитин кутабыт.

Өссө 30-35 мүнүүтэ буһарабыт. Сылаастыы остуолга биэрэр ордук.

Хачапури

Ортотугар сымыыт уоһаҕа саһаран сытарын иһин хачапурины эмиэ сааскы күҥҥэ майгыннатыахха сөп. Дьиҥнээх хачапури тиэстэтэ биир хонуктаах буолуохтаах.

 

Тиэстэтигэр:

Бурдук – 680 г;

Туус – 14 г;

Доруоһа – 9 г;

Саахар – 25 г;

Уу – 480 г;

Оливка арыы – 25 г.

 

Начыыныгар:

Адыгея сыыра – 600 г;

Сулугуни сыыр – 600 г;

Сымыыт уоһаҕа – 6 уст.

 

Бурдугу, тууһу, доруоһаны, саахары, ууну улахан иһиккэ холбуу кутан, илиибитинэн сыстаҥнас тиэстэни охсобут. Өр мэһийбэппит, бурдук барыта илийээтин кытта, тиэстэбитин сүүрбэччэ мүнүүтэ сынньата уурабыт.

Онтон оливка арыытын тиэстэбитигэр кутан иҥэрэбит, ол аата улаханнык мэһийбэккэ, көннөрү баттаталаан арыыны тиэстэҕэ киллэрэбит. Биир эрэ төгүл “сааһылыыбыт” – ол аата тэниччи ууннары тардан баран, төттөрү шарик оҥоробут. Эмиэ сынньатабыт.

 30 мүнүүтэ буолан баран эмиэ сааһылыыбыт. Өссө иккитэ оннук гынабыт, ол аата тиэстэбит 1 чаас устата тахсар.

Эмиэ “сааһылаан” баран холодильникка хаппахтаах иһиккэ уган хонноробут. Тиэстэбит 12 чааһынан дьэ бэлэм буолар. Аны туран бу тиэстэни үс хонук устата холодильникка илдьэ сылдьан утары астыахха сөп.

Сынньаммыт тиэстэбитин таһааран алта чааска араарабыт, төкүнүтэн баран 1 чаас өссө таһаара түһэбит. Салапаанынан хайаан да бүрүйэбит. Ону кытта духуопкабытын сылытабыт, буһарарбыт саҕана оһохпут муҥутуур итиитигэр тиийбит буолуохтаах.

Сыырбытыттан начыыммытын бэлэмниибит – бөдөҥнүк түөркэлиибит. Сымыыт уоһахтарын араартыыбыт. Биир хачапурига биир уоһах барар, икки уоһахтаатахха, өссө минньигэс буолар.

Тиэстэбитин тыы курдук быһыылаах гына илиискэ ууруохтаахпыт. Ол туһугар бастаан 20-25 см диаметрдаах төгүрүктүү быһыылаан чараас гына хаптатабыт уонна икки кытыытын эрийэн, тыы оҥоробут.

Сыыр начыыммытын ботуччу соҕустук тэлгиибит. Сыыр уонна тиэстэ ыйааһыннара тэҥ буолуохтаах. Холобур, тиэстэҕит 250 г буоллаҕына, сыыргыт эмиэ 250 г буолара наада.

Биир илиискэ иккилии хачапурины уурар ордук, тиэстэ үллэр, тэнийэн биэрэр. 10-15 мүнүүтэнэн тиэстэ саһарчы буһуоҕа, сыыра ууллуоҕа, оччоҕо хостоон ылан ортотугар сыыры биилкэнэн сыҕарытан баран, сымыыт уоһаҕын уурабыт уонна 30-40 сөкүүндэ эрэ духуопкаҕа уган ылабыт.

Бу бүлүүдэ ип-итии духуопкаҕа түргэнник киирэн тахсар, итиилии сиэниэхтээх.

Персиктээх, рикоттолаах бөрүөк

Рикотто диэн сыыр сымнаҕас көрүҥэ бурдук аска олус барсар.

 

Бурдук – 250 г;

Саахар – 180 г;

Разрыхлитель – 8 г;

Апельсин цедрата – 1 г;

Сымыыт – 3 уст.;

Персик – 5 уст. (персик хомпуота эмиэ барсар);

Оливка арыыта – 60 мл (мас арыытынан солбуллар).

 

Саахары сымыыты кытта күүгэннириэр диэри миксеринэн күүскэ  ытыйабыт. Рикотто сыыры сиитэ нөҥүө таһааран, ытыллыбыт сымыыппытыгар эбэбит.

Кураанах бурдукка разрыхлитель кутан булкуйабыт. Ытыллыбыт сымыыкка холбуубут, манна апельсин цедратын уонна арыыбытын эбэн, тиэстэ мэһийэбит.

Тиэстэбитин төгүрүк быһыылаах формаҕа тэнитэ ууран баран, персиктэри тэлгэтэбит, кыратык баттаан тимирдэн биэрэбит.

Эрдэттэн сылытыллыбыт духуопкаҕа 180-200 кыраадыска 50 мүнүүтэ буһар. Таһаарыах уонча мүнүүтэ иннинэ бөрүөкпүтүн хостоон бытархай саахары хойуу соҕустук таммалатабыт уонна төттөрү духуопкаҕа уган ситэри буһарабыт.

Буспутун зубочистканан бэрэбиэркэлиибит. Остуолга сойутан баран ууруллар.

Овсянкаттан галета

Овсянканы бурдук курдук буолуор диэри блендердиибит. Түргэнник буһар бытархай овсянка бэйэтинэн да барсар.

 

Тиэстэтигэр:

Овсянка – 100 г;

Бурдук – 100 г;

Уу – 70 мл;

Саахар – 25 г;

Мас арыыта  - 50 мл;

Разрыхлитель – 1 ч.нь.;

Туус – быһах тумсугар.

 

Начыыныгар:

Дьаабылыка – 3 уст.;

Корица – төһөнү сөбүлүүргүтүнэн;

Саахар – 1 ост.нь.

 

Сиидэлэммит бурдугу, овсянканы, саахары разрыхлители кытта үчүгэйдик булкуйабыт. Туспа иһиккэ оргуйбутунан ууну мас арыытын кытта холбуубут. Онтон бурдукпутугар кутан тиэстэ мэһийэбит. Кытаанах тиэстэ тахсыахтаах. Сотторунан сабан, 20-чэ мүнүүтэ сынньатабыт.

Начыыммытын бэлэмниибит: хаҕыламмыт дьаабылаканы чараас гына кырбыыбыт.

Тиэстэбитин пергамеҥҥа төгүрүччү тэнитэбит. Дьаабылакабытын төгүрүччү сааһылаан уурабыт, кытыытынан 4-5 см хаалларабыт. Корица, саахар таммалабыт. Кытыытын бүк тутан, сааһылаан биэрэбит.

180 кыраадыска 40 мүнүүтэ буһар. Хас биирдии хаһаайка бэйэтин духуопкатын үлэтин билэр. Саһарыар диэри буһаран ылаҕыт. Маҥнай галета хачыгырас буолар, хонноҕуна сымныыр.

Сонуннар

Ордук ааҕаллар

Ким? Төһө? Туохха?
Сонуннар | 17.02.2024 | 12:00
Ким? Төһө? Туохха?
Ааҕааччыларбытын кытта Сахастат ааспыт 2023 сыл түмүгүнэн таһаарбыт өрөспүүбүлүкэбит социальнай-экономическай туругун кэккэ чахчыларын кытта үллэстэбит.
Ийэлиин кэпсэтии...
Сонуннар | 16.02.2024 | 18:30
Ийэлиин кэпсэтии...
Анал байыаннай дьайыы тиэмэтин суруйарбар төрөппүтү, ийэни, аҕаны кытта кэпсэтэр ордук ыарахан. Кэпсэтэ олорон бөтө бэрдэрэн, оҕотун санаан, аһынан тохтоон, хараҕын уутун соттон, ол быыһыгар, кини туһунан кэпсиэхтээҕин, кини дьоруойун бар дьон билиэхтээҕин санаан, күүстээх санаатын, тулуурун киллэрэн эмиэ саҥарбытынан барар. Биир сөҕөрүм диэн, маннык кэпсэтиилэргэ биир да төрөппүт, уолаттар...
Ыар сүтүк
Дьон | 17.02.2024 | 16:00
Ыар сүтүк
Үүммүт саҥа сылга Баатара нэһилиэгэ уонна Мэҥэ Хаҥалас улууһа эрэ буолбакка, бүттүүн өрөспүүбүлүкэ ыар сүтүктэннэ.