Сааскы халааҥҥа бэлэмнэниини өссө төгүл бэрэбиэркэлээтилэр

Куорат дьаһалтата ыам ыйын 13 күнүгэр сааскы халааҥҥа бэлэмнэнии туругун бэрэбиэркэлээтэ.
Көһө сылдьар мунньахха баһылыгы хаһаайыстыба боппуруостарыгар солбуйааччы Владислав Слепцов, куорат прокурора Виктор Умеренко, ГО уонна ЫБМ салайааччыта Николай Егоров, туһааннаах тэрилтэлэр, структуралар, итиэннэ өрөспүүбүлүкэ таһымнаах салайааччылар кыттыыны ыллылар. 

Бэрэбиэркэлээччилэр бастатан туран Докуускайдааҕы ТЭЦ оройуонугар баар инженернэй тутуулары уонна ыксаллаах быһыы-майгы үөскүүр түгэнигэр нэһилиэнньэни олохтуур быстах кэмнээх пууннары көрдүлэр. 
Ол курдук, чуолаан Сэбиэскэй Аармыйа, 35/1 уулуссаҕа 13 №-дээх оскуолаҕа уонна Сыырдаах бөһүөлэгэр «Алгыс» кулуупка баар пууннар иһэр уунан, аһылыгынан, эминэн-томунан о.д.а. толору хааччыллыбыттара, дьуһуурустуба тэриллибитэ быһаарылынна. Хаһаайыстыбалаах ыаллар сүөһүлэрин үрдүк сиргэ таһаарбыттар.

Хамыыһыйа В.И. Кононов аатынан Капитоновкатааҕы кырдьаҕастар уонна инбэлииттэр интэринээт-дьиэлэрин таһынааҕы ким да билиитигэр киирбэккэ турар муоста туругун көрдө. Бэлиэтээн эттэххэ, куорат, нэһилиэк, интэринээт да салалталара бу муостаҕа сыллата өрөмүөн ыытан, кумах кутан кэллилэр. Өрүс аастаҕына быйыл хапытаалынай өрөмүөнү ыытар туһунан быһаарыыны ыллылар.
Ыам ыйын 13 күнүнээҕи туругунан Өлүөнэ өрүс Ленскэй уонна Өлүөхүмэ оройуоннарынан уста сытар. Покровскай – Дьокуускай икки ардыгар муус ыам ыйын 13-14 күннэригэр, ол эбэтэр урукку сыллартан 3 хонук эрдэлээн хамсыыра күүтүллэр, диэн Олохтоох дьаһалта пресс-сулууспата иһитиннэрэр.