Сааскы халааҥҥа бэлэмнэнии хаамыыта

Быйыл Өлүөнэ өрүс 3-4 күнүнэн эрдэлээн устара сабаҕаланарынан, баһылык Евгений Григорьев туһааннаах структуралары уонна Хатас, Табаҕа нэһилиэктэрин, Пригороднай сэлиэнньэтин салалталарын кытта сааскы халаан уутугар бэлэмнэнии хаамыытын билистэ.

«Быйыл өрүс ыам ыйын 13 - 15 күннэригэр ааһара сабаҕаланар, ол эбэтэр 3-4 хонугунан эрдэлиир сибикилээх. Бүгүн куорат соҕуруу эҥээрин – Эргэ Табаҕа, Саҥа Табаҕа, Хатас уонна Пригороднай – бэрэбиэркэлээтибит. Пригороднай протокатын кытылын  бөҕөргөтүү иитинэн куорат маастар-былааныгар 5,7 км усталаах сири оҥоруу киирэн турар. Маныаха өрөспүүбүлүкэ бырабыыталыстыбатын, экология министиэристибэтин кытта бырайыак-смета докумуонун бэлэмниир сорук турар», – диэтэ Евгений Григорьев.

Баһылык эбэн эппитинэн, Өлүөнэ күргэтин тутуу иитинэн Эргэ Таҕаттан Мэҥэ Хаҥалас Хаптаҕайыгар диэри биэрэги бөҕөргөтүү үлэтэ Эргэ Таҕа боппуруоһун быһаарыаҕа.

Куорат прокурора Виктор Умеренко нэһилиэнньэни быстах кэмҥэ олохтуур пууннар докумуоннарын, онно ыытыллар бэлэмнэнии үлэтин туругун сөптөөҕүнэн сыаналаата.

Санатар буоллахха, Табаҕа, Пригороднай уонна Хатас нэһилиэктэригэр биирдии пуун баар, манна утуйар тэрил, медпуун, остолобуой, ийэ уонна оҕо хосторо барыта баар, диэн иһитиннэрэр Олохтоох дьаһалта пресс-сулууспата.