Сааскы бырааһынньык иннинэ 16 ийэни наҕараадалыахтара

Саха сирэ үтүө үгэскэ кубулуйбут элбэх оҕолоох ийэлэри чиэстээһини салҕыыр. Наҕараадалааһын кулун тутар 6 күнүгэр, Аан дойдутааҕы дьахталлар күннэрин көрсө буолуоҕа. Өрөспүүбүлүкэ сэттэ оройуонуттан уон алта дьахтар судаарыстыбаннай наҕараадалары ылыахтара.

Оҕолоох ыаллары өйөөһүн былаас биир сүрүн хайысхатынан буолар. Өрөспүүбүлүкэбитигэр бу Арассыыйа бэрэсидьиэнэ Владимир Путин көҕүлээһининэн саҕаламмыт национальнай “Дьиэ кэргэн” бырайыагынан уонна Ил Дархан Айсен Николаев ыйааҕынан олоххо киирэр.

2017 сылтан үрдүк наҕарааданы сүүһүнэн ийэ ылбыта. Холобур, уон уонна онтон элбэх оҕону төрөппүт, ииппит 34 дьахтарга “Дьоруой Ийэ” бэлиэ туттарыллыбыта.

Ханнык наҕараадалар уонна төлөбүрдэр көрүллэллэрий

“Дьоруой Ийэ” бэлиэни 10 уонна онтон элбэх оҕону иитэн таһаарбыт ийэлэргэ туттараллар. Онно 1 мөлүйүөн солкуобай бириэмийэ бэриллэр (онус эбэтэр салгыы оҕолор 2000 сылтан эрдэ төрөөбүт буоллахтарына уонна саамай кыра оҕо биир сааһын туоллаҕына).

“Ийэ албан аата” бэлиэ үс истиэпэннээх буолар уонна 7, 8, эбэтэр 9 оҕолоох ийэлэргэ ананар. Төлөбүрдэр 100 000-тан 300 000 солкуобайга диэри.

“Ийэҕэ үрдүк махтал” бэлиэ – сыл аайы үс дьахтарга көхтөөх позицияларын уонна уопсастыбаннай үлэлэрин иһин бэриллэр. Бириэмийэ кээмэйэ – 100000 солк.

Наҕарааданы ыларга дьиэ кэргэн чилиэннэрэ Арассыыйа гражданина буолуохтаахтар, чөл олоҕу тутуһуохтаахтар, оҕолорун бары өттүнэн сайдыыларын өйүөхтээхтэр. Үлэһиттэр, олохтоох салайыныы уорганнара, олохтоохтор эбэтэр уопсастыбаннай тэрилтэлэр кандидаттары туруоруохтарын сөп. Сайаапкалары өрөспүүбүлүкэ баһылыгын иһинэн анал хамыыһыйа көрөр.