Саас айылҕаҕа тахсарга

Саас дьон үксэ айылҕаҕа талаһыыта күүһүрэр. Халлаан сылыйаатын кытта ким балыктыы, ким походтуу, сынньана, дьаарбайа хайаан да айылҕаҕа таҕыстахпытына эрэ эттиин-сиинниин, өйдүүн-санаалыын чэбдигирбиккэ дылы буолабыт.

Ол эрээри бу дьыл кэмнэрэ хардарсар утааларыгар айылҕаҕа уһуннук сылдьарга кэккэ быраабылалары тутуһуллуохтааҕын өйдүүрбүт наада. Ойуурга, тыаҕа ыраата, уһуу барарга хомунарбытыгар тугу болҕойуохтаахпытый?

Бастатан туран, сааскы кэмҥэ халлаан туруга уларыйымтыатын учуоттуур ордук. Күнүһүн уонча кыраадыс сылаас турбут халлаан киэһэ тоҥорон туран кэлиэн сөп. Маны сэргэ уу-хаар элбэх кэмигэр сир инчэҕэйин, бадараан, чалбах куура илигин учуоттуубут. Онон хайаан да хаттык таҥас хас да көрүҥүн, уларыттар эбии атах таҥаһын илдьэ барабыт.
Хонор буоллахха, баччаларга сииги өтүппэт балаакканы ылар ордук. Утуйар мөһөөччүк анныгар тэлгииргэ анал хас да хос араҥалаах коврик туһалыа. Манна утуйар мөһөөччүк көрүҥнэрин болҕойор наада. Халлаан туругуттан көрөн араастаһаллар. Үрүсээги ууну өтүппэт матырыйааллааҕы, элбэх хос сиэптээҕи ылар ордук. Сатыы ойуурга, үрдэл сирдэргэ хаамары былааннааччы треккинг паалкаларын ылыан сөп. Халтархай, туруору сирдэргэ тирэх буолар аналлаахтар. Аны туран, сааскы күн сытыытык көрөр. Инньэ гынан салгын ачыкытын, күнтэн тириини харыстыыр СПФ кириэми уктан илдьэ сылдьыахха наада. Сэби-сэбиргэли, таҥаһы-сабы сииктэн харыстыырга бэртээхэй гермомөһөөччүктэр, чехоллар диэн бааллар. Сааскы сыырастан сээкэйдэри бэркэ харыстыхтара. Испиискэни, зажигалканы эмиэ маннык мөһөөччүккэ эбэтэр боростуой салапааҥҥа суулуохха сөп. Маны сэргэ хас саҥа сырыы аайы аптечканы хаҥатан, саҥардан иһэр ордук. Үгүс киһи саас иммунитета мөлтөөн кыраттан да сыыстарыан сөп. Онон биинтэни, баатаны таһынан тымныйыыттан көмөлөһөр сириэстибэлэри, аллергияны бохсор эмтэри чугас илдьэ сылдьарга кыһаныҥ.

Дьонноох сиртэн ыраата тэйэ барарга, төһө да бэйэҕэ эрэллээх буолбут иһин, GPS-навигатор, компас, рация курдук гаджеттары илдьэ сылдьар ордук.