Саахымакка СӨ Ил Дарханын кубога үс сиринэн ыытыллыаҕа

Кулун тутар 31 күнүттэн муус устар 10 күнүгэр диэри ыытыллар киэҥ далааһыннаах спорт тэрээһинэ Бүтүн Арассыыйатааҕы таһымнаах түөрт турниры түмүөҕэ: эр дьоҥҥо саахымакка Арассыыйа кубогын түһүмэҕин, блиц күрэхтэһиини, түргэн саахыматы (рапид), ону сэргэ саахымат композициятын суоттааһыҥҥа бастакы турниры.

СӨ Ил Дархана Айсен Николаев иһитиннэрбитинэн, күн бүгүн Саха сиригэр саахыматынан 9 тыһыынча кэриҥэ киһи дьарыктанар, онон маннык үрдүк таһымнаах турнирдар оҕо спорда сайдарын көҕүлүүллэрэ саарбаҕа суох.

Күрэхтэһии  үс сиринэн ыытыллыаҕа: Өктөмҥө, Аллараа Бэстээххэ уонна Дьокуускай куоракка.

Бэлиэтээн эттэххэ, турнирдарга норуоттар икки ардыларынааҕы алта гроссмейстер кыттарын бигэргэппит. Кинилэр ортолоругар урукку сыллар кыайыылаахтара бааллар. Маны сэргэ тэгил сиртэн тэҥнээхтэр, ааттаах-суоллаах чөмпүйүөннэр биир түһүлгэҕэ мустуохтара.  

Бириис уопсай пуондата – 2 мөл. солк. Кыайыылаахтар уонна призердар «Киэргэ» ювелирнай фирмаҕа оҥоһуллубут ураты көстүүлээх ааптарыскай мэтээллэринэн наҕараадаланыахтара. Ону сэргэ, тэрийээччилэр тус-туспа номинацияларга анал ааттары олохтуохтара.