Саахар диабеттаахтар оскуолалара көдьүүстээхтик үлэлиир

Дьокуускай куорат 3-с №-дээх балыыһатын иһинэн үлэлиир саахар диабеттаах пациеннар оскуолаларыгар сыл саҕаланыаҕыттан 136 киһи үөрэннэ.

Бу маннык хабааннаах диабеттаахтар оскуолалара Саха сирин бастакы сүһүөх тэрилтэлэригэр үксүлэригэр баар. 3-с №-дээх балыыһа иһитиннэрбитинэн, балыыһа саахар диабеттаахтарын учуотугар билигин 3 тыһ. кэриҥэ киһи турар.

«Биһиги пациеннарбытын бэйэни хонтуруолланыы ньымаларыгар үөрэтэбит, ыарыыны баалаппат туһугар сэрэтии үлэтин ыытабыт, чөл олох, сөпкө аһааһын нуормаларын билиһиннэрэбит. Истээччилэргэ анаан дьарыктары эндокринолог быраастарбыт поликлиникабыт базатыгар тиһигин быспакка ыыталлар», – диэн 3-с №-дээх балыыһа кылаабынай бырааһа Анна Парфенова иһитиннэрэр.

Ааспыт сылга балыыһа эндокринологтара ыыппыт 38 дьарыктарыгар уопсайа 343 истээччи сылдьыбыт. Бу сылга «Продолжительная и активная жизнь» бырайыагы олоххо киллэриигэ ыытыллар тэрээһиннэр чэрчилэринэн 15 саахар диабетын оскуолатын үлэлэппиттэр. Манна 136 киһи үөрэммит, олортон 10-на 1 тииптээх саахар диабетынан ыалдьар оҕо. 

Бу үлэ сүрүн соругунан үөрэтии көмөтүнэн ыарыһах олоҕун хаачыстыбатын тупсарыы буолар. Оскуола эмп көмөтүн таһынан, аһылыктарын, физическэй ноҕуруускаларын, хааннарыгар саахар таһымын хайаан да хонтуруолланарга күһэллэр 1-кы уонна 2-с тииптээх саахар диабетынан ыалдьааччыларга аналлаах үлэлиир.