Сааһырдыбыт диэн олорон хаалбатахтар

100 сааһыгар диэри парашютунан ыстаммыт

Соҕуруу Африка олохтооҕо Джорджина Харвуд бу эдэр да киһи соччо санаммат дьарыгынан 90-нун ааһан баран үлүһүйбүт. Бастакытын 92 сааһыгар ыстаммыт, иккиһин – 97 сааһыгар. Үһүс сырыытын 100 сааһын туолар үбүлүөйдээх күнүгэр, чугас дьоно көрөн турдахтарына, түспүт. Онно сөп буолбакка, ол күн өссө биир ураты быһыыны оҥорбут – акыйаан анныгар акулалар төгүрүктээбит тимир килиэккэлэригэр киирэн тахсыбыт. Ол кэннэ хайа чыпчаалыгар үбүлүөйдээх дьоро киэһэтигэр ыалдьыттарын көрсө тиэтэйбит.

Ити кэннэ Джорджина өссө үс сыл бэрт сэргэхтик олорбут. 103 сааһын туолан баран, биир сарсыарда уһуктубатах, уу чуумпутук сытан ол дойдуга аттаммыт.

80 сааһыгар балет искусствотыгар сыстыбыт

Великобритания олохтооҕо Джон Лоу сэрии ыар сылларын этинэн-хаанынан билбит: билиэҥҥэ түбэһэ сылдьыбыт, чох хостуур шахтаҕа үлэлээбит, онон олох аһыытын-ньулуунун балай эмэ амсайбыт. Сэрии кэнниттэн дойдутугар төннөн, аналын көрсөн, ыал буолбут, дьиэ-уот тэриммит. Оҕолор улаатан, атахтарыгар турбуттар, сиэн диэн минньигэс дьону бэлэхтээбиттэр. Баҕар, оннук олоруохтааҕа эбитэ буолуо. Ону баара...

80 сааһын туоларыгар сиэннэрэ балет устуудьуйатыгар илдьибиттэр. Эһэлэрэ, станокка тураат, бу дьарык киниэнэ буоларын өйдөөбүт, ону ааһан хас хамсаныыта бэркэ сатанарыттан бэйэтэ да соһуйбут. Биир сылынан ытык кырдьаҕас сыанаттан түспэт “сулуска” кубулуйбут.

90 сааһын туолар үөрүүлээх күнүгэр “Худуоһунньук олоҕо” диэн сольнай балетын толорон, дьон-сэргэ биһирэбилин ылбыт. Ити да кэннэ олохтон туоруор диэри сөбүлүүр дьарыгын бырахпатах. Ытык кырдьаҕас оҕолорун, сиэннэрин, хос сиэннэрин тапталларыгар угуттанан, 99 сааһыгар диэри дьоллоохтук олорбут.

Кырдьар сааһыгар диджей буолбут

Британияттан төрүттээх Рут Флауэрс Португалияҕа олохсуйбут.  Дьылҕа Хаан ыйааҕынан 60 сааһыгар огдообо хаалбыт. Соҕотоҕун тэһийбэт, чуҥкуйар буоллум дии санаан, дойдутугар Бристоль куоракка төннөргө быһаарыммыт. Онно тиийэн баран олоҕо 180 кыраадыс уларыйбыт. Хайдах диэ?

Биирдэ сиэнэ эбэтин төрөөбүт күнүгэр... түүҥҥү кулуупка ыҥырбыт. Бука, кэлиэ суоҕа дии санаатаҕа. Дьэ, доҕор, бырааһынньыкка мустубут ыалдьыттар соһуйуохтарын иһин, эмээхсин тиийэн кэлбит, эбиитин сарсыардааҥҥа диэри эдэрдэри кытта тэбис-тэҥҥэ сылдьыбыт. Итинэн бүппэтэх, аны эрчимнээх эбээ бэчэрииҥкэ кэннэ диджей буолабын диэн турбут.

Баҕар, күлүөххүт, ол эрээри сиэнэ чугас киһитин баҕа санаатын толорон, продюсер булан биэрбит. Сотору кэминэн Мами Рок (Рут айар аата) Европа кулууптарын “хайа тардар”, чааһынай бэчэрииҥкэлэргэ ыҥырыыга сылдьар буолбут. Гастролларын графигын сүүрбэччэлээх да оҕо уйара саарбах үһү, оннук ыгым эбит. Куораттан куоракка көтөртөн, түүннэри үлэлииртэн чаҕыйбатах. Кини тиийэр кулууптарыгар өрүү толору киһи мустара. Баҕар, төһө баҕарар оннук тилигирии сылдьыахтааҕа, ону, хомойуох иһин, 83 сааһыгар гастроль быыһыгар аҕыйах күҥҥэ дьиэтигэр сынньана кэлэн баран, биир сарсыарда уһуктубатах.

Аҕам саастаахтар күннэринэн! Эдэрдии эрмиҥитин ыһыктымаҥ, сааһырдыбыт диэн олорон хаалымаҥ!