“Саһыл саҕаланаары” гыммыта табыллыбатах

Дьокуускайга олохтоох полиция үлэһиттэрэ боростуой кыбартыыраны уонунан омук дьонугар “сымыйа” аадырыска кубулутар схеманы арыйбыттар. Бабушкин уулуссатыгар баар кыбартыыра 34 саастаах хаһаайката кэлии дьону сымыйанан регистрациялаан сылтан ордук кэмҥэ харчы оҥосто олорбут. Уопсайа кини икки хостоох кыбартыыратыгар 40-тан тахса киһи регистрацияламмыт, ол эрээри кинилэртэн биир да киһи онно хонон да турбатах.

Өҥө чэпчэкитэ суох эбит. Полиция быһаарбытынан, дьахтар хас биирдии килийиэниттэн миграционнай учуокка туруорарга биэстэн уон биэс тыһыынча солкуобайы ылбыт. Сыана төһө өр болдьоххо олорууттан тутулуктаммыт: үс ыйга эбэтэр биир сылга диэри пропискалааһынтан. Килийиэннэри урукку бииргэ үлэлээбит кэллиэгэлэриттэн уонна билэр дьонун нөҥүө булаттыыр эбит. Схема 2025 сыл тохсунньутуттан бу сыл кулун тутар ыйыгар диэри үлэлээбит.

Билигин хаһаайкаҕа холуобунай дьыала оҥоһуллуон сөп. Полиция киниэхэ өссө регистрацияламматах “килийиэннэр” баалларын бэрэбиэркэлиир.