Саһарбыт хаартыскалар тугу кэпсээтилэр...

Оҕо эрдэхпиттэн саалабыт истиэнэтигэр олус кичэйэн оҥоһуллубут, таҥыллыбыт араамалаах хаартыска баарын итиннэ туруохтааҕын курдук саныырым. Биирдэ эмит өйдөөн-дьүүллээн көрдөхпүнэ, «Ити тээтэҕит бииргэ сэрииилэспит, аармыйаҕа сылдьыбыт бойобуой доҕотторо» диэн этэллэрэ. 
Кэлин улаатан, сааһыран баран көрдөххө, саллаат уолаттар анаан-минээн хаартыскаҕа түһэрэр устуудьуйаҕа түспүттэр, ким олорор, ким турар, бу кыраһыабайдарын, эдэрдэрин.

Бу олох аҕыйах хонуктааҕыта, эдьиийим кэлэ сырыттаҕына: «Бээ, ити хаартыскалары ылан көрүөххэ, кэннигэр хайаан да суруктаахтар буолуо», - диэн, уонна аҕабыт сэрии кэнниттэн 1947 сылга диэри ханна сылдьыбытын билээри, араамалаах хаартыскалары аргыый ылан арыйан көрдүбүт.

Арыый халыҥ кумааҕыга оҥортоору, сыһыараары быһыылаах, худуоһунньук А.К. Саврасов «Грачи прилетели», 1952 сыллаахха тахсыбыт хартыынатын туттубут. Онон, бастакы билиибит – бу доҕотторун хаартыскаларынан арааманы 1952 сылга оҥорбут диэн буолла. Ол эбэтэр 73 сыл тыытыллыбакка, арыллыбакка турбут! Онтон дьэ саллааттар ханна түспүттэрин, ким, туох буолалларын көрөөрү, биирдии ылаттаатыбыт, аахтыбыт. Биробиджан куорат, 1947, 1948 сыл, ахсынньы, тохсунньу ыйдар эбит. Онон өссө биир кистэлэҥи биллибит. Бу тухары аҕабыт сэрии кэнниттэн салгыы ханна сулууспалаабытын билбэт эбиппит, дьиибэ!

Мантан аллараа ааҕааччыларбар саһарбыт хаартыскалары, сорохторо Саха сириттэн сылдьыбыт уолаттар бааллар, баҕар, кими эмит билиэххит диэн бэчээттииргэ сананным.