Саҥа уопсастыбаннай туоналары бырайыактаан саҕалыахтара

Быйылгы Бүтүн Арассыыйатааҕы куоластааһыҥҥа Дьокуускай куорат аҕыс бырайыагынан кытынна, онтон үһэ – Юрий Гагарин аатынан сквер,  «Обнаженные сердца» сквер уонна Тёплай күөл кытыла ордук элбэх куолаһы ылла.

Саха сирин сүрүн архитектора Любовь Папок иһитиннэрбитинэн, тупсарыллыахтаах эбийиэктэри бырайыактыыр үлэ саҕаламмыт. Онуоха бырайыактааһыҥҥа уонна ону олоххо киллэрэргэ, нэһилиэнньэни, холбоһуктары уонна урбаанньыттары кытыннарарга улахан болҕомтону уурарга сүбэ-соргу бэриллибит. Итини сэргэ бырайыак докумуоннарын оҥорорго управалары уонна туһааннаах тэрилтэлэри кытта көрсүһүүлэр ыытыллыбыттар.

Любовь Папок Тёплай күөл кытылын тупсарар бырайыак хас да түһүмэҕинэн олоххо киирэрин, ону таһынан үгүс үбү эрэйэрин, «Куорат табыгастаах эйгэтин оҥоруу» бырайыак иитинэн көрүллэр харчы тиийбэтин бэлиэтээн эттэ.

«Түһүмэхтэргэ араарарга уонна куорат олохтоохторо куоластыылларыгар зоналары быһаарарга сүбэлиибит, чуолаан «Кырдьаҕас куорат-2» курдук дьоһун суолталаах зона инники кэскилин чорботон бэлиэтиибит – бу территория маастар-былаан иитинэн олоххо киириэҕэ», – диэтэ Папок.

Бырайыак докумуоннарын оҥорор үлэ салҕанар. Саҥа уопсастыбаннай туоналар нэһилиэнньэ интэриэһин учуоттуохтаахтар, куорат сайдыытын ирдэбиллэригэр сөп түбэһиэхтээхтэр. 

Хаартыска: t.me/letoykt2 ханаалтан