Саҥа үөрэх дьылыгар кэккэ уларыйыылар киирэллэр

Дьиссипилиинэ сыаната

Бастакы кылаастан саҕалаан хас биирдии үөрэнээччигэ бэрээдэгин иһин сыана турар буолуо. Оскуола устаабын тутуһууну ирдиир, оҕо быһыытын-майгытын, тутта-хапта сылдьыытын иһин сыана ылар.

Манна бэлиэтээн эттэххэ, бу сыана үөрэххэ туттарсыыга туох да оруолу оонньообот.

Дьиэҕэ үлэтэ суох

Маҥнайгы кылааска үөрэнэр оҕоҕо дьиэтээҕи сорудах бэриллибэт буолар. 

Обществознание уонна история

“Обществознание” предметэ 6-8 кылаастарга суох буолар. 9 кылаастан эрэ саҕалаан киирэр. Босхоломмут чаастара Арассыыйа историятын үөрэтиигэ бэриллэллэр.

Омук тыла

5-7 кылаастарга омук тылын чааһын аччатыы бигэргэтилиннэ (нэдиэлэҕэ 2 чаас хаалар).

Саҥа предмет

5-с кылаастарга “Арассыыйа духуобунай култуурата” («Духовно-нравственная культура России») төрүт сыаннастары үөрэтэр уруок эбиллэр.

Судургу ОГЭ 

9 кылаас кэннэ колледжка барар оҕолор икки булгуччулаах эксээмэни эрэ туттараллар (нуучча тыла, математика). Атын предметтэри туттарбаттар.

Үрдүк үөрэх кыһаларыгар

Бакалавриат уонна магистратура оннугар базовай үрдүк үөрэх (4-6 сыллаах) диэн киирэр. Уонна “идэтийбит үрдүк үөрэх” (1-3 сыллаах) баар буолар.

Саҥа сокуон: ыал буолбут устудьуоннар уопсайга бастакынан туспа хос ылар бырааптаахтар.