Саҥа үөрэх дьылыгар бэлэмнэнии үгэнэ

Тимирязев уул., 72, “Солнышко” уһуйаан сэбиэдиссэйэ Арина Готовцева кэпсээбитинэн, дьиэлэрэ 1975 сыллаах тутуу, 160 оҕону ылар миэстэлээхтэр эрээри, билиҥҥитэ 130 оҕону ылбыттар – 4 бөлөххө араарбыттар. Биир хоско сүрүннүүр истиэнэ хайдан, иитиллээччилэрин ахсаанын көҕүрэтэргэ күһэллибиттэр.

Кыһалҕа үөскүөҕүттэн Үөрэх управлениетынан тэриллибит хамыыһыйа хас да бэрэбиэркэни, чинчийиини ыыппыт. Уһуйаан хапытаалынай өрөмүөн федеральнай бырагырааматыгар хапсарын туһугар фундаменын бөҕөргөтүү үлэтэ барыан наада – бу бырагыраамаҕа кыттыы хайаан да тутуһуллар ирдэбилэ.

Маны таһынан, уһуйааҥҥа ититии систиэмэтигэр уонна канализацияҕа кэккэ кыһалҕалар бааллар, билиҥҥитэ бэйэлэрин күүстэринэн өрөмүөн ыыталлар. 2018 сыллаахха манна кыра хапыталааный өрөмүөн ыытыллыбыт, ол үрдүнэн, үлэһиттэр туруорсалларынан, толору хапытаалынай өрөмүөнү ыытар уолдьаспыт.

Ольга Яшина бэлиэтээбитинэн, уһуйаан бөҕөргөтүү үлэтигэр наадыйар дьиэ-уот испииһэгэр бастакы уочарат киллэриллиэхтээх.

Ленин пр., 60, 3-с №-дээх оскуола. Бу оскуола эмиэ сүрүн истиэнэтэ хайдыылаах. Баһылык солбуйааччыта өрөмүөн хайаан да наадатын бэлиэтээтэ.

“3-с №-дээх оскуола федеральнай бырагырамаанан өрөмүөннэнэрин туһугар оскуола администрацията техническэй докумуоннары хомуйан саҕалыан наада. Оттон  “Солнышко” уһуйааҥҥа фундамены бөҕөргөтүү үлэтэ 2027 сыллаахха оҥоһуллуоҕа.

Үөрэх дьыла саҕаланыан иннинэ тэрилтэлэри бэрэбиэркэлээһин баар кыһалҕалары тута быһаарарга төһүү буолар”, – диэтэ Ольга Яшина.