Саҥа оскуоланы көрдүлэр

Бүгүн, кулун тутар 25 күнүгэр, Дьокуускай куорат баһылыга Евгений Григорьев М.Е. Николаев аатынан саҥа аһыллыахтаах 40-с нүөмэрдээх оскуола төһө бэлэмин көрдө. Бу 990 миэстэлээх оскуола Дьокуускайга баар оскуолалартан саамай улаханнара буолар. Саҥа үөрэх дьылыгар манна 30-туу оҕолоох 33 кэмпилиэк кылааһы арыйары былаанныыллар. Онтон 3-һэ нууччалыы уонна сахалыы тылынан үөрэтэр маҥнайгы кылаас буолуохтаах. 17 тыһ. кв. м иэннээх оскуола дьиэтэ үөрэҕи толору, хаачыстыбалаахтык биэрэргэ толору хааччыллыбыт, ол курдук манна химия кылаастара, үлэ мастарыскыайдара, киэҥ-куоҥ бибилэтиэкэ, икки улахан спорт саалата, улахан остолобуой уо.д.а. бааллар.  

Оскуола биир уратытынан манна “Воин” байыаннай-спортивнай киин үлэлиэхтээх. “Саҥа оскуола үлэтин саҕалаатаҕына Автодорожнай уокурукка баар үөрэх кыһаларын ноҕурууската биллэ кыччыа, ол оҕо үөрэнэр, преподавателлэр үлэлиир усулуобуйаларын тупсарыа диэн эрэнэбин” диэн Евгений Николаевич телеграм-каналыгар суруйда.