Саҥа кыбартыыра муҥутуур удамыр сыаната төһө эбитий?

Онтубут баара-суоҕа 19,8 кв м иэннээҕэ, Пушкин оройуонугар Шушара диэҥҥэ баара этиллэр. Тута этиэх тустаахпыт – ис оҥоһуута (отделката) суох.  

Оттон оҥоһуулаах кыбартыыраны 3 мөл. 660 тыһ. чэпчэкигэ булбат үһүгүн. Оччо сыаналаах Питер Красногвардейскай оройуонун Полюстрово түөлбэтигэр баар эбит.

Оттон Москубаҕа олунньу ыйга саҥа дьиэҕэ муҥутуур чэпчэкитик атыыга барбыт устуудьуйа-кыбартыыра 4 мөл. 300 солк. сыаналааҕа холобур быһыытынан бэриллибит.

Манна даҕатан эттэххэ, Дьокуускай килбэйэр киинигэр кэриэтэ сиргэ – Ленин бэрэспиэгигэр турар 1976 сыллааҕы тутуу бастакы этээһигэр толору хааччыллыылаах, баара-суоҕа... 8 м2 иэннээх хос 1 мөл. 500 солк. атыыланар эбит. Биһиэхэ атыыланар муҥутуур кыра иэннээх олорор дьиэ бу баар быһыылаах. Оттон биир кв сыанатыгар таһаардахха, бээ, онтуҥ ботуччу буолар.

Холобур, Дьокуускай Сэбиэскэй Аармыйа уулуссатыгар турар сиэксийэлэрдээх уопсай дьиэҕэ баар 14,1 м иэннээх хос балтараа мөлүйүөҥҥэ турар. М. Николаев аатынан уулуссаҕа турар 1987 сыллааҕы тутуу КПД-га 17 кв. м хос 1 мөл. 600 тыһ. солк. атыыланар эбит.

Оттон саҥа тутулла турааччылары сыаналарын өҥөйтөлөөн көрбүппүт, холобур, 27, 6 кв м иэннээх устуудьуйа-кыбартыыра 4 мөл. 471 тыһ. 200 солк. турара. Эмиэ саҥа утулла турар тоҕус мэндиэмэннээх дьиэҕэ баар 25,97 кв м иэннээх устуудьуйа сыаната 4 мөл. 207 тыһ.  солк. этэ. Бу – муҥутуур намыһах сыана диэххэ сөп. Атыттар сыаналара итинтэн таһыччы үрдүк.