Саҥа кэлэр оптуобустары ханнык маршруттарга биэриэхтэрэй?

Куорат баһылыгын бастакы солбуйааччы Владимир Дорожкин «Эхо столицы» саайтка иһитиннэрбитинэн, чааһынай тиэйээччилэр ылыахтара. Холобур, 5-с маршрут икки эрэ саҥа оптуобустаах, 15-һэ – ПАЗ. Ону сэргэ 16, 19 уонна 2 №-дээх маршруттарга тиэхиньикэ саҥардыллара уолдьаспыт. Манна даҕатан эттэххэ, ноҕуруускалара үрдүк атын да маршруттарга эбии оптуобустары ыытан иһэр сорук турар. Ол эбэтэр бу маршрукка бэрилиннэ, хайаан да онно эрэ сылдьыахтаах диэн буолбатах.  

Уопсастыбаннай тырааныспар үлэтигэр инникитин да үгүс уларыйыы күүтэр. Владимир Дорожкин иһитиннэрбитинэн, оптуобус тиийбэт сирдэригэр маршруттары уһатан эбэтэр эбэн биэриэхтэрэ.

Маны таһынан ТПУ-лар (транспортно-пересадочный узел) үлэлэрин тэрийии боппуруоһа күүскэ турар. Ол киирдэҕинэ, куорат таһынааҕы маршруттар киин уулуссаларга киирбэккэ, дьону ТПУ-ларга түһэрэр буолуохтара. Дорожкин этэринэн, ити, бастатан туран, куорат уулуссаларыгар айан-сырыы аҕыйыырыгар көмөлөһүө, иккиһинэн, куорат таһынааҕы маршруттар үлэлэрин күүһүрдүө.  Дьону оптуобустан атын оптуобуска көһүү (пересадка) ордук долгутар. Манна Олохтоох дьаһалта хас да суолу көрөр. Эһиил бу хайысхаҕа үлэ саҕаланыахтаах. 

Бырайыас сыаната үрдүө дуо? Дорожкин эппитинэн, билигин тарыыбы үрдэтэр боппуруос тура илик. Ол эрээри сыл аайы, муус устар ый диэки, инфляцияны, ороскуот улаатыытын учуоттаан туран, ити ыйытыы күөрэйэр.

«Биллэн турар, салгыы саҥа оптуобустары атыылаһар кыах баар буоларын, уопсастыбаннай тырааныспары сайыннарар туһугар бу боппуруоһу дьүүллэһиэхпит», – диир куорат баһылыгын бастакы солбуйааччы.

Суол-иис, уопсастыбаннай тырааныспар боппуруостарыгар 300-900 колл-киин үлэлиирин санатабыт. Сарсыарда 9:00 чаастан киэһэ 21:00 чааска диэри, өрөбүлэ суох үлэлиир.