Саҥа iPhone 18 Pro Max атыыга тахсыбыт эрээри...

Саҥа Айфон 65 араас дойдуга атыылана турар. Ол иһигэр эрдэттэн сакаастаспыт Арассыыйа олохтоохторо да хаалсыбатахтар, баҕалаах гаджеттарын тутан эрэллэр.

Куһаҕана диэн, барыны бары сатыыр гына таҥыллыбыт төлөпүөн араас эгэлгэ “абын-алыбын”, туһалаах дьайыыларын (функции) Арассыыйаҕа толору туһанар кыаллыбат. Кырата, 18 функцията үлэлээбэт биитэр настройкатыгар эрэгийиэни уларытыаххын, английскайдыы интерфейсы туһанары сатыыр буолуоххун наада.

Иккиһинэн, баһырхай сыаналаах. Ханна атыыланарыттан, таҥыллыбытыттан тутулуктанан, биллэн турар, сыаната араастаһар. Билигин муҥутаан чэпчээбитэ? 18-с саҥа айфону – 147 тыһ. солкуобайга, Айфон 18 PRO – букатын да 157 тыһ. солк. тахса сыанаҕа атыылаһыахха сөп.

Хамнас алын кээмэйэ 64 тыһ. 733 солк. (итинтэн нолуок көҕүрүүр) буолбут кэмигэр атын наадаларгыттан сатаан  ырыбыллаан ууруннаххына, кырата,  сыл аҥаара мунньунан ылыахха сөп. Онуоха диэри сыаната түһэрэ биллэр. Бастаан утаа халлааннаан кыырайан баран, “эргэрэн”, саҥа көрүҥ тахсан истэҕин гаджет сыаната сыыйа түһэр үгэстээх.

Туга үлэлээбэтий?

Судургутук быһаардахха, Айфоҥҥа туттуллар Оҥоһуу өй (Apple Intelligence) тиһигэр нуучча тылын туһаныы киллэрбэтэхтэр. Итинтэн сиэттэрэн, уу иһэ-иһэ хайгыыр саҥа супер Siri-лара даҕаны, ол нөҥүө салаллар ChatGPT даҕаны биһиэхэ үлэлээбэт. Нууччалыы тиэкиһи саҥарбытыҥ атын омук тылларыгар курдук тиэкис буола суруллубат, көннөрөн суруйуу туһунан букатын да умнарга тиийэҕин.

*Супер Siri-ни англия тылынан эрэ туһаныахха сөп.

Эрийэн баран атын тылларынан саҥаран бардахтарына, сообщение кэллэҕинэ, наушникка сатаан нууччалыы саҥаҕа быһа тылбаастаабат.  Нууччалыы суруйан бэйэҥ эмодзиларгын сатаан сакаастаан оҥорторбоккун. Ол эбэтэр Genmoji нууччалыы тыллаах аккауннарга үлэлээбэт. Хаартысканан көрдөтөн булуу, хаартыскаҕа баар эбийиэктэри сотторуу, галареяттан хаартысканы көрдөтөн булуу эмиэ сатаммат. Быһата, саҥардыллан оҥоһуллубут Clean Up эмиэ үлэлээбэт.

Visual Intelligence эмиэ үлэлээбэт. Холобур, атын дойду олохтоохторо төлөпүөн экранын ханнык эмэ тутуу вывескатыгар туһаайааттарын кытта ол вывескаҕа сыһыаннаах иһитиннэрии кыл түгэни иһигэр арылла түһэр буоллаҕына, биһиги дойдуга кыаллыбат. Ол эрээри эн англия тылын баһылаабыт түгэҥҥэр итинтэн иҥнибэккин.

Төлөпүөн туох баар интерфейсын уонна Siri-ни английскайга көһөрөн баран, төлөпүөнүҥ Оҥоһуу Өйүн үгүс күүһүн-кыаҕын туһанар кыахтааххын. Һэ-һэ, арааһа барахсаттар, Арассыыйа ыччата омуктуу тылы баһылыыр интэриэстэммит диэбиттэр быһыылаах.

Өссө биир куһаҕана, Apple Pay Арассыыйаҕа туттуллар Visa, Mastercard уонна МИР каарталары сол да “көрбөт, аахпат”.  App Store-тан төлөбүрдээх сыһыарыыны, оонньууну атыылаһар, iCloud, Apple Music подпискаланыы олус уустук уонна эрэйдээх.

Мобильнай төлөпүөн счетуттан (МТС уонна Билайн) ити Айфонтан син биир  сатаан төлөһүллүбэт.  

Техническэй уонна гео-хааччах эмиэ баар. Холобур ойуурга, хайаҕа сылдьан мунан хааллаххына, спутнигы туһанан суһал SOS иһитиннэриини – эгэ көннөрү сообщение кыаллыа дуо,  бу саҥа Айфонтан  хайдах да ыытар кыах суох.

Төһө да бу төлөпүөҥҥэ 5G баарын иһин,  Apple бырагырааматан Арассыыйа суотабай эпэрээтэрдэрин профилын активациялаабат гына таҥмыт.

Оттон уонна саамай итэҕэһэ – биһиги дойдуга Apple официальнай норуоттар икки ардыларынааҕы мэктиэтэ суох буолар. Ол аата төлөпүөнүҥ алдьаннаҕына эйиэхэ ити төлөпүөнү, параллельнай импорт сокуонугар олоҕуран,  атыылаабыт маҕаһыын гарантиятынан эрэ оҥотторуохха, өрөмүөннэтиэххин сөп.

Эрдэ тахсыбыт Айфоннарга хааччах сорох өттө бу иннинэ да дьайара. Холобур, Арассыыйа бааннарын сыһыарыытын бааннарга тиийэн хачайдатарга күһэллэллэр. ВКонтакте уонна ону кытта үлэлиир сыһыарыылар суох оҥоһуллубуттара. МАХ сыһыарыы суох. Обновление аайы, көрдөххө, ол хааччах эбиллэн иһэр.

Түмүктээн эттэххэ, Оҥоһуу Өй үлэлээбэт төлөпүөнүн итиччэ сыанаҕа ылар наада дуу, суох дуу – хас биирдии атыылаһааччы, бэйэтэ эрэ билэр, быһаарынар. Бэлэхтиэн, бэлэхтэтиэн баҕарааччылар эмиэ бу  саҥа Айфон элбэх функцията биһиги дойдуга үлэлээбэтин билэргит, кэлин кэмсинэ сылдьыбаккытыгар көмөлөһүө диэн, сорох өттүн сатанарынан сырдата сатаатыбыт.