Саҥа дьылы доруобуйаҕа куттала суох көрсүөххэ

Саҥа дьыл үөрүүлээх түгэнин бары кэрэтин билэн дуоһуйарга бырааһынньык остуолугар сөбүгэр аһааһын, эти-сиини көхтөөхтүк хамсатыы көмөлөһүө.  Дьокуускайдааҕы 3 №-дээх балыыһа пресс-сулууспата бырааһынньык остуолун хайдах сөпкө тэрийэргэ, хайдах-туох аһыырга, доруобуйаҕа эппиэтинэстээхтик сыһыаннаһарга таһаарбыт сүбэлэриттэн бэчээттиибит.

— Сиэри таһынан тото аһаама. Остуол хотойорунан аска туттунар ыарахан буоллаҕына, барытын боруобалыыр санаа баһыйдаҕына, амсайарга баартан бэрт кыралыыны ылан куттубут ордук.

— Эт аһы оҕуруот аһын кытта, хортуоппуйтан ураты, дьүөрэлиир ордук.

— Моркуоп, хаппыыста салааттарын эбэтэр кырбастаммыт сибиэһэй оҕуруот аһын таларга кыһаныҥ.

— Саҥа дьыл бырааһынньыгын остуолугар салаат арааһа, ол эбэтэр майонез элбэх буолар. Кыаллар буоллаҕына майонеһы лимон симэһининэн, сүөгэйинэн эбэтэр оливка арыытынан солбуйа сатааҥ.

— Устар киэһэни, уһун түүнү быһа остуолтан турбакка олорумаҥ, кыралаан хамсаныҥ. Сөптөөх көхтөөх хамсаныыга ас түргэнник тарҕанар, ол аата куртах ноҕурууската кыччыыр.

— Дьиҥэр, ахсынньы 31 күнүгэр, көннөрү атын күҥҥэ курдук, киэһээҥҥи аһылыгы 18-19 чаастан саҕалыыр, онтон саҥа дьылы чэпчэки сокуускаларынан көрсөр үчүгэй этэ.

— Олус элбэҕи астаамаҥ. Ас сибиэһэй буолара – доруобай буолуу бэлиэтэ уонна сүһүрүү кутталын да кыччатыа.

— Өскөтүн сиэри таһынан аһаан кэбистэххэ, анал ферменнэринэн көмөлөһүннэриэххэ сөп.

— Итирдэр утаҕы ордук-хос истэххэ, активированнай чох уо.д.а. курдук абсорбеннар көмөлөһүөхтэрэ. Ону таһынан элбэх уу, минералка, хатарыллыбыт фрукта утаҕа, тууһаммыт оҕурсу эбэтэр помидор ороһуола бэттэх кэлэргэ туһалыахтара. Бу балар алкоголь суурайбыт электролитынан хааччыйан, эти-сиини чөлүгэр түһэрэргэ наадалар. Маны тэҥэ арыгыны хото испит киһиэхэ доруобуйатын көннөрөрүгэр утуйан сынньаныы көмөлөһүө. 

— Бырааһынньык кэннинээҕи күн, улахан остуол кэннэ, эти-хааны ноҕуруускаламмат: хайыһардааһыны, сэниэлээхтик хааман дьаарбайыыны уо.д.а. манна хабааннаах ноҕуруускалары атын күҥҥэ уталытар ордук. Сүрэх-тымыр ыарыыларын көбүппэт сыалтан.

— Саҥа дьыл курдук улахан бырааһынньыктар кэннэ, үгэс курдук, итирдэр утахтартан сүһүрээччи, ону тэҥэ куртах-оһоҕос куолаҕайын ыарыылара көппүт дьон ахсаана үксүүр идэлээх. Бу биир үксүн арыгылаах утаҕы уһун кэмҥэ тохтообокко иһииттэн быар уонна ас буһарар уорганнар ноҕуруускаланыыларыттан тахсар.

Арыгыттан баттатыыны уонна аһара баран аһааһыны сэрэтэр «аптаах эмп» диэн суох. Онон бу түгэҥҥэ бастыҥ сүбэ – барыта кээмэйинэн, сөбүгэр буоларыгар кыһаныҥ.

Дьокуускайдааҕы 3 №-дээх балыыһа пресс-сулууспата