Саҥа дьыллааҕы корпоративтан аккаастаналлар

Саха сиригэр судаарыстыбаннай былаас уонна олохтоох бэйэни салайыныы уорганнарыгар Саҥа дьыл уо.д.а. улахан бырааһынньыктар корпоративтарын ыыппаттарыгар сүбэлээтилэр. Оҕо аймах бырааһынньыктан матыа суоҕа.

Ол курдук, СӨ Ил Дарханын уонна Бырабыыталыстыбатын дьаһалтата Саҥа дьылы кэлэктиибинэн бэлиэтииртэн аккаастанна.

«СӨ Ил Дарханын уонна Бырабыыталыстыбатын дьаһалтатыгар кэнники сылларга корпоративтар ыытыллыбаттар. Кэлэктиибинэн бырааһынньыктар номнуо хаһыс да сылын тэриллибэттэр, бу да сыл, билиҥҥи балаһыанньаны учуоттаан туран, ураты буолуо суоҕа. Маннык сүбэ былаас уорганнарыгар барыларыгар бэрилиннэ, ол иһигэр муниципальнай тэриллиилэргэ, ону таһынан бүддьүөт тэрилтэлэригэр», – диэн бэлиэтээтэ СӨ Ил Дарханын уонна Бырабыыталыстыбатын дьаһалтатын салайааччыта Георгий Михайлов.

Оттон уһуйааннарга уонна оскуолаларга үгэскэ кубулуйбут утренниктар, о.д.а. оҕолорго аналлаах тэрээһиннэр ыытыллыахтара.  

«Саҥа дьыллааҕы тэрээһиннэр туох-ханнык иннинэ биһиги оҕолорбутугар ананаллар. Кинилэр бырааһынньыктан матыа суохтаахтар», – диэтэ Георгий Михайлов.

Ол курдук, сыл аайы ыытыллар үгэс буолбут тэрээһиннэр – Саха сирин бары муннуктарыттан уонна куораттарыттан талааннаах оҕолору мунньар Ил Дархан Харыйата, ону таһынан  өрөспүүбүлүкэ сүрүн болуоссатыгар харыйа уотун уматыы үөрүүлээх түгэнэ хайаан да тэриллиэхтэрэ.

Хаартыска: «Киин куорат» хаһыат архыыбыттан