«Саҥа дьыллааҕы Дьокуускай» күрэх кыайыылаахтара билиннилэр

Саҥа дьыл аптаах-алыптаах күннэригэр тапталлаах Дьокуускайбыт өссө киэркэйэр, кыһыҥҥы остуоруйа дойдутугар кубулуйар. Бу кэмҥэ куорат тэрилтэлэрэ аныгы уот-күөс, иллюминация көмөтүнэн, сорохтор хаары, мууһу чочуонайдыы чочуйан, тиэргэннэрин киэргэтэллэрэ ордук кэрэхсэбиллээх.

Уһун өрөбүллэр саҕаланыахтарын аҕай иннинэ киин куорат Олохтоох дьаһалтата «Саҥа дьыллааҕы Дьокуускай» күрэх түмүгүн таһаарбыта, кыайыылаахтарын наҕараадалаабыта.  Санатан эттэххэ, куонкурус куорат тэрилтэлэрин икки ардыларыгар биллэриллибитэ.  Ирдэбил быһыытынан, саҥа дьыллааҕы киэргэтиигэ аныгы уоту-күөһү туһаныы, сонун сүүрээни киллэрии сыаналаммыта. Кыттааччылар, чахчы, бэркэ бэлэмнэммиттэр, ох курдук оҥостубуттар. Тэрилтэлэригэр киирэр ааннарын, дьиэлэр илин өттүлэрин уонна тиэргэннэрин харыйа курдук сиэдэрэйдик симээбиттэр, уотунан сандаардыбыттар.

Дьэ, кыайыылаахтарынан ханнык тэрилтэлэр ааттаннылар?

«Лучшее праздничное световое и иллюминационное оформление входной группы, фасада здания и прилегающей к нему территории со светодиодной объемно-пространственной композицией и ледовыми скульптурами проспекта Ленина города Якутска» анал аат бастыҥнара буоллулар:

Бастакы миэстэ – Елена Гнездина («Город Цветов» сибэкки маҕаһыына). Бирииһэ – 140 тыһыынча солкуобай.

Иккис миэстэҕэ Михаил Яковлев («Oh my garden» сибэкки маҕаһыына) тигистэ, 100 тыһыынча солкуобай харчыны бириис тутта.

Үһүс бочуоттаах миэстэни ылбыт Иннокентий Охлопков (Арассыыйа наукаларын академиятын Сибиирдээҕи салаатын Криолитозона биологическай проблемаларын института) 75 тыһыынча солкуобай харчынан наҕараадаланна.

«Лучшее праздничное световое и иллюминационное оформление входной группы, фасада здания и прилегающей к нему территории со светодиодной объемно-пространственной композицией и ледовыми скульптурами на территориях, кроме проспекта Ленина города Якутска» анал аат бастыҥнара:

Бастакы миэстэни Михаил Горохов («Дьокуускай аэропорда» аахсыйалаах уопсастыба) ылла уонна 120 тыһыынча солкуобай харчынан наҕараадаланна.

Иккис миэстэҕэ  Айталинa Кротова (Дьокуускай куорат 10 №-дээх «Туллукчаан» оҕо уһуйаана) тигистэ. Кини 90 тыһыынча солкуобайы тутан, үөрүүтэ үксээтэ.

Гаврил Халымаров («Созвездие» ОДьКХ салайар хампаанньата ХЭТ) үһүс бочуоттаах миэстэ хаһаайына буолла. Бирииһэ – 70 тыһыынча солкуобай харчы. 

Кыайыылаах аатын сүкпүт уонна миэстэлэспит тэрилтэлэр Дьокуускай куорат Олохтоох дьаһалтатын махтал суруктарын туттулар.

Хаартыскалар: Тэрийэр кэмитиэттэн