Саҥа дьыл өрөбүллэригэр быһыыны туруоруу тохтообот
Өрөспүүбүлүкэ медицинскэй тэрилтэлэрэ уһун өрөбүл кэмигэр күн аайы коронавирус инфекциятын утары быһыыны туруораллар. Бу туһунан брифиҥҥэ регионнааҕы Суһал штаб салайааччытын солбуйааччы Ольга Балабкина иһитиннэрдэ.
«Саҥа дьыллааҕы бырааһынньыктар уонна каникуллар кэмнэригэр – ахсынньы 31 күнүттэн 10 күнүгэр диэри өрөспүүбүлүкэ үрдүнэн медицинскэй тэрилтэлэргэ быһыыны туруоруу өрөбүлэ суох ыытыллыаҕа», — диэтэ кини.
Итини тэҥэ вице-премьер оройуоннар Суһал штабтарын уонна дьаһалталарын, ону сэргэ тэрийээччилэрин бырааһынньыктааҕы тэрээһиннэри ыытыыга гражданнарга санитарнай-эпидемиологическай куттал суох буолуутун хааччыйарга ыҥырда.
«Тэрээһиннэр буолар сирдэрин дезинфекциялыыр, кыттар гражданнары QR-кодунан эбэтэр ПЦР ыспыраапкаларынан киллэрэр ирдэнэр. Култуура тэрилтэлэригэр саала 70% эрэ туолуохтааҕын туһунан санатабын», — диэн бэлиэтээтэ Ольга Балабкина.