Саҥа дьиэ тутулларыттан үөрбэккэ олоробут...
Хаарбах туруктаах самнайбыт дьиэлэр оннуларыгар халлааҥҥа харбаспыт үрдүк мэндиэмэннээх таас тутуулар дьэндэһиэхтэрэ диэн түүлбүтүгэр да түһээн көрбөтөхпүт. Тыый, билигин Сайсары күн-түүн улаатар, сайдар.
“Мэтээл икки өрүттээх” дииллэрэ кырдьык эбит. Ону олохтоохтор бэйэбитинэн биллибит.
Былырыыҥҥыттан Лонгинов-Ново-Карьернай уулуссалар быһа охсуһууларыгар «Новые Высоты» диэн саҥа комплекс тутулла турар. Бастаан сыбаайатын түһэрэллэрин саҕана бэркэ сэргии санаабыппыт. Онтон тутуу тэтимирэн, киэҥ сири тайаан барбытыгар, сөбүлээбэппит улам элбээн испитэ...
Бастатан туран, таһаҕас тиэйэр массыыналар төттөрү-таары тиэстэн, онто да суох мөлтөх суолбутун иэдэттилэр. Өссө ааспыт кыһын биир оннук тиэхиньикэ канализация барар турбаларын далбы таарыйан, улахан саахал тахсыбыта, хас да күн уута суох олорорго күһэллибиппит.
Сайын күн аайы кэриэтэ хара сарсыардаттан улахан массыыналар суолбутун (Ново-Карьернай уул.) бүөлээн, бу диэки олорооччулар эрэйи көрдүбүт: тимир көлөлөөхтөр хаайтаран, сатыы дьон ааһар сирбит суох буолан. Аны үлэһиттэрэ бары кэриэтэ тимир көлөлөөхтөр быһыылаах, онто да суох кыараҕас суолбутун сарсыардаттан киэһээҥҥэ диэри баһылаан-көһүлээн тураллар.
Ханнык баҕарар тутуу ыытылла турар сиригэр күрүө, хахха баар буолуохтаах ини? Бастаан кырдьык-хордьук баара, кэлин Ново-Карьернай өттүн олоччу ылан кэбиспиттэрэ, Лонгинов өттүгэр эрэ хаалларбыттара. Кыһыл, маҥан дьураалаах лиэнтэни ыйаабыттара таах тыалга тэлибирии тураахтыыр. Ити кэлэргэ-барарга олус сэрэхтээх. Чэ, баҕар, биһиги, улахан дьон булан сылдьыахпыт, оттон манан төһөлөөх элбэх оҕо ааһарый?
Тутуу бара турар сирэ наһаа кирдээх. Үлэһиттэр хомуйа, ыраастыы сылдьыахтаахтар буолбатах дуо? Ыһыллан-тоҕуллан, киһи хараҕын үөрдүбэт көстүү. Бу саас, сайын тыаллаах, дохсун ардахтаах күннэргэ киһи аттынан ааһыан да куттанара – бөх-сыыс көтө сылдьара. Эбиитин туох эрэ уутун ыыталлар, ол аайы суолбут чалбах, бадараан буола турар. Сатыы дьоҥҥо далаһа дуомун бырахпыттара, ону баара, талах саба үүнэн, хаамарга кыараҕас.
Аны туран, бырайыактыылларыгар, сирин оҥороллоругар туох эрэ сыыһа-алҕас тахсыбыт дуу, хайдах дуу, аарыма улахан дьиэ суол айаҕар субу анньан турар (итэҕэйбэт буоллаххытына, хаартыскалары көрүҥ). Онтубут күн-түүн «үллэн», «саллайан» иһэрэ салыннарар. Ама, ирдэбилгэ эппиэттиир дуо? Суолтан төһө эмэ тэйиччи, ыраах туруохтаах ини?
Пааспарыгар суруллубутунан, “Горпроект” ХЭТ бырайыактаабыт, тутуу 1085 кв. миэтэрэ иэннээх сири ылар. Кыбартыыратын ахсаана – 203.
Бачча улахан комплекс өссө үлэҕэ киирдэҕинэ, дьиҥнээх «көрдөөх» олох, дьэ, саҕаланара буолуо... Тоҕо диэ? Манна 16-с нүөмэрдээх эрэ оптуобус сылдьар, барыта ПАЗ, биир-икки эрэ улахан аныгы оптуобус баар. Билигин даҕаны сарсыарда, киэһэ үтүрүһүү, анньыһыы буолар. Санаан көрүҥ, 203 кыбартыыралаах дьиэҕэ бэйэтэ кыра нэһилиэк дьоно олохсуйуо турдаҕа. Уопсастыбаннай тырааныспар тиһигэр туох эрэ уларытыы киирдэҕинэ табыллыыһы диэн көрөбүн.
Чэ, ити курдук, быһата, саҥа тутулла турар дьиэттэн үөрбэккэ олоробут...
Т. Саввинова, куорат олохтооҕо
Сонуннар
Ордук ааҕаллар
