Үс улууска сүппүт дьону көрдүүллэр

Өлүөхүмэҕэ отоннуу сылдьан муммут дьахтары көрдүүллэр. Быыһааччылар иһитиннэрэллэринэн, 1952 уонна 1953 сыллааҕы төрүөх кэргэнниилэр Сосновка диэн сиргэ, дьон олорор сириттэн 50 км тэйиччи, мотуорунан отоннуу барбыттар. Оттоннуу сылдьан икки аҥыы арахсыбыттар, ол кэннэ дьахтар сүппүт. Эр киһи бастаан бэйэтэ көрдүү сатаабыт, онтон балаҕан ыйын 9 күнүгэр кыыһыгар иһитиннэрбит, кыыһа Өлүөхүмэ улууһун ЕДДС тыллаабыт. Дьокуускайтан быыһааччылар бөлөхтөрө тиийэн үлэлии сылдьар. Ойууру тараахтаабыттар, беспилотник көтүтэн тыаны үрдүттэн көрөллөр.

Уус Майаҕа Солнечный бөһүөлэккэ сүппүт 2007 сыллааҕы төрүөх обургу оҕону көрдүүллэр. Оҕо сүппүтүн туһунан ийэтэ балаҕан ыйын 9 күнүгэр иһитиннэрбит. Оҕо дьиэтиттэн балаҕан ыйын 5 күнүгэр 23:00 чааска тахсан барыаҕыттан ханна баара биллибэт. Дьокуускайтан үс киһилээх быыһааччылар бөлөхтөрө тиийэн үлэлии сылдьар. Нэһилиэк таһынааҕы быраҕыллыбыт тутуулары чинчийдилэр, беспилотниктары көтүттүлэр.

Кэбээйигэ Өлүөнэ өрүскэ сүппүт үс эр киһини көрдүүллэр. Кинилэр сүппүттэрин туһунан иһитиннэрии балаҕан ыйын 16 күнүгэр киирбит. Эр дьон мотуордаах тыынан балыктыы сылдьан сүппүттэр. Быыһыыр сулууспа водолазтара үлэлии сылдьаллар.

СӨ Быыһыыр сулууспата айылҕаҕа тахсарга сэрэххитин сүтэрбэккитигэр ыҥырар. Барыаххыт иннинэ айаҥҥыт маршрутун, хаһан төннөр былааннааххытын чугас дьоҥҥутугар хайаан да иһитиннэриҥ диэн сүбэлииллэр.