С.С. Васильев-Борогонскай төрөөбүтэ 118 сылыгар аналлаах «Өлбөт өрөгөй ырыаһыта» тэрээһин ыытылынна

Балаҕан ыйын 25 күнүгэр Суоттубут нэһилиэгэр биир кэрэ-бэлиэ күн буолан ааста. Улуу Кыайыы өрөгөйдөөх 80 сылынан, Саха Өрөспүүбүлүкэтин Судаарыстыбаннаһын күнүн көрсө киэн туттар биир дойдулаахпыт – талааннаах поэт, очеркист, публицист, бөдөҥ уопсастыбаннай деятель, Былатыан Ойуунускай аатынан Судаарыстыбаннай бириэмийэ лауреата С.С. Васильев-Борогонскай төрөөбүтэ 118 сылыгар аналлаах «Өлбөт өрөгөй ырыаһыта» үгэс буолбут үтүө тэрээһин   ыытылынна.

Поэт Сергей Васильев төрөөбүт күнүгэр умнуллубат чаҕылхай күннээх күһүҥҥү күн турда. Сүдү киһибит аатын үрдүктүк ааттаан, Өлүөнэ эбэбит биэрэгиттэн саҕалаан Аҕа дойду уоттаах сэриитигэр кыттыбыт биир дойдулаахтарбытын, Уус Алдан оройуонун хорсун буойуннарын кэриэстиир өйдөбүнньүк Мэҥэ тааска сүгүрүйүү, С. Васильевка аналлаах кэрэ көстүүлээх сквергэ «Киһи аҕыс кырыылаах буолуохтаах» тэрээһин, поэт олоҕун, айар үлэтин сырдатар музей дьиэтигэр үөрүүлээх чаас ыытылынна.

Салгыы «Түһүлгэ» СК Сергей Степанович үйэлээх айымньыларыгар суруйан хаалларбыт кынаттаах тылларынан «Уһун үйэм сандал сааһа», «Сибэккинэн үйэ салҕанар, сибэккинэн олох киэркэйэр», «Кылбаҥнаа эрэ, кылыһым» быыстапкалары арыйыы, «Киэн тутун, мин Ийэм» дьиэ кэргэн аллеятыгар саҥа өйдөбүнньүк ыскамыайкалары үөрүүлээх бэлиэтээһин буолла.

Маны таһынан, нэһилиэк салалтата, тэрилтэ салайааччылара, бэтэрээннэрэ «Дьол туоната» төгүрүк остуол тула олорон 2027 сыллаахха С. Васильев төрөөбүтэ 120 сылын көрсө үйэтитии үлэтин ситимнээхтик, тэрээһиннээхтик ыытыы туһунан кэпсэттилэр. Кэскиллээх этиилэр, санаалар этилиннилэр, инники былааннар торумнаннылар.

Бу кэмҥэ «Көмүс күһүн бэлэҕэ» Хоноҕор б. «Үрдэл» түөлбэтэ тэрийиитинэн Хоноҕор сүрүн оскуолатын, Уус Алданнааҕы техникум кэлэктииптэрэ, «Мордовской В.С.» чааһынай урбаан оҕуруотчуттара, нэһилиэк минньигэс астаах хаһаайкалара  атыы-тутуу быыстапка-дьаарбаҥкаҕа кытыннылар.

Үтүө тэрээһини түмүктээн «Торҕо күөх дойдуга тулааһын буоллун диэн» добун чаас буолла, «Кыргыттар, уолаттар, дьэ ыллаан дьиэрэтиҥ...» бырааһынньыктааҕы кэнсиэр дьиэрэйдэ.

Бэлиэ күҥҥэ көхтөөх кыттыыны ылбыт нэһилиэкпит олохтоохторугар, уопсастыбаннаһыгар, үүнэр көлүөнэ ыччаппытыгар, оҕолорбутугар тэрийээччилэр, Хоноҕордооҕу "Түһүлгэ" СК (сал. Е.Н. Гоголева), олохтоох библиотека ааттарыттан барҕа махталбытын этэбит.

Үйэлэри үрдүнэн үлдьү көтөр аналлаах саха бастакы суруйааччыларын чулуу бэрэстэбиитэлэ, саха литературатын, уопсастыбаннай олоҕун сайдыытыгар сүдү кылааты киллэрбит, дьон, норуот туһугар олорбут патриот, уһун үйэлэргэ киэн туттар поэппыт Сэргэй Баһылайап-Борогонскай аата өрүү ааттана туруохтун, кэнчээри ыччакка үтүө өйдөбүл буолуохтун!