«Үһүс көлүөнэ оскуолата» саҥа дьиэҕэ наадыйар

Кинилэр биир сиргэ олорон турбаттар, хамсаныы, үҥкүү, иистэнии, ырыа-тойук, оһуохай, олоҥхо, теннис, оҕуруо тиһиитэ, хоһоон суруйуута, айан, кэлии-барыы барыта баар.

Бу кимнээхтэрий? Кинилэр – “Үһүс көлүөнэ оскуола” “кыргыттара” уонна “уолаттара”. «Киин куорат» тг-ханаала быһаарбытынан, сурутааччыбыт баһыйар өттө 50+ саастаах дьон буоларынан, бүгүн биһиги «Үһүс көлүөнэ оскуолатын» дириэктэрэ Пелагея Юрьевна Прядезникова кытта кэпсэттибит:

– Оскуола 2012  сыллаахха тэриллиэҕиттэн күн бүгүн да тигинэччи үлэлии турар. Биһиэхэ аан бастаан кэлэр киһи расписаниены, ханнык куруһуоктар баалларын билсиэн наада. Расписаниелар кабинеттар ааннарыгар суруллан тураллар, маны таһынан “Школа третьего возраста” диэн телеграм ханааллаахпыт, онно үөһэ “шапкатыгар” барыта сурулла сылдьар: куруһуоктар, салайааччы аата-суола, төлөпүөнэ. Онно эрийэн, билсэн, туох наадатын, тугу илдьэ кэлиэн сөбүн ыйыталаһар. Аадырыспыт: Федор Попов уул., 14/6 дьиэтэ.

Барыта 32 куруһуок үлэлиир: чэбдигирдэр, үөрэҕирии, айар, фольклорнай дьарыктар уонна декоративнай-прикладной искусство.

Омук тылын кытта үөрэтиэхтэрин сөп. Манна бөлөхтөрүнэн арахсаллар, уруккуттан саҥарар, тылы билэр уонна саҥа үөрэнэр диэн. Куруһуок салайааччыларынан бары бэйэлэрин идэлэринэн үөрэхтээх дьон, ону таһынан норуот маастардара үлэлииллэр.

Куруһуоктар тустарынан кылгастык билиһиннэрдэххэ, иккис сылын мэйиигэ аналлаах гимнастика чэбдигирии хайысханан үлэлиир. Физкультура баар, хамсаныы грациятыгар ааптарыскай бырайыак, этнофитнес, фитнес-дэнс, остуол тенниһэ.

Илиинэн оҥорон таһаарар элбэх куруһуок баар: иистэнии, кырыйыы, ньэмиэт оҥоруу, оҕуруонан тигии, киэргэл арааһын оҥоруу. Кыл, сиэл өрүүтэ, живопись, валяние, макраме, аныгылыы көрүҥнээх сахалыы таҥаһы тигии, кыбытык тигии, о.д.а.

Үҥкүү, ырыа, хомус, олоҥхо, норуот ырыаларын ансаамбылларын этэ да барыллыбат, омук сиригэр тиийэ куонкурустарга ситиһиилээхтик кыттан кэлэллэр. Фортепиано, баян доҕуһуолунан вокалга дьарыктаналлар, былырыыҥҥыттан кырыымпаҕа эмиэ дьарык үлэлиир.

“Сайдам саас” литературнай куруһуок үлэлиир, хоһоон суруйарга холоноллор, кинигэ таһааттараллар.

Маны таһынан, “Күөх сайын” сайыҥҥы лааҕырдаахпыт.  Өлүөнэ очуостарыгар Батамайга палаатканан түһэ сытан сынньаналлар. Быйыл 128 киһини хаптыбыт. Өссө Кадетскай оскуола базатыгар “Серебряные каникулы” лааҕырдаахпыт. Манна өрөспүүбүлүкэ 22 улууһуттан 110 киһи кэлэн сынньанна. Бу лааҕырдар СӨ Үлэ уонна социальнай сайдыы министиэристибэтин субсидиятынан тэриллэн үлэлииллэр, онон түгэнинэн туһанан улахан махталбытын тиэрдэбит.

“Незабудка” сенсорнай хоһу кэпсээбэтэххэ табыллыбат курдук. Манна саастаах дьон, инбэлииттэр кэлэн дьарыктаналлар, деменцияҕа хаптарбыт, ыалдьа да илик дьон сылдьаллар. Анал үөрэхтээх психолог үлэлиир, музыкатерапия, песочнай терапия, өйдөрүн, болҕомтолорун, кутталтан босхолоноллорун, саастаах киһи хас биирдиилэрэ туһунан уйулҕалаах, ону көрөн дьарыктыыллар. Манна суруйтаран кэлиэхтэрин сөп, төлөбүрэ суох.

Биһиэхэ сылдьыбыт, сылдьар дьон эдэрдэрин эргитэллэр, олохторо тупсар, уһуур, сэргэхсийэллэр.

Ким баҕар кэлиэн сөп, хааччах суох, кыанар, бэйэтэ кэлэр-барар буоллаҕына, барыларын ыҥырабыт.

Саҥа дьиэни туруорсубуппут олох ыраатта. Билигин Олохтоох дьаһалта үлэлэһэ сылдьар. Баҕа санаабыт туолуо диэн эрэнэбит. Былырыыҥҥыттан күүстээхтик үлэлии сылдьаллар, дьиэтэ баар, өрөмүөнүгэр үп-харчы боппуруоһа быһаарыллыан наада, онон Евгений Николаевичка улаханнык эрэнэбит уонна күүтэбит.

Саҥа дьиэҕэ көстөхпүтүнэ, сиэннэрбитин кытта үлэлиэхпитин баҕарабыт. Оҕолору кытта эһээлэр, эбээлэр тэҥҥэ  сылдьан, сатабылларыгар, өбүгэ үгэһигэр үөрэтиэ этилэр. Былааммыт киэҥ, саҥа сылга барыгытыгар үтүө, дьоллоох олоҕу, кытаанах доруобуйаны,  этэҥҥэ буолууну, эйэни баҕарабын.