Үс Хатыҥҥа саҥа аарканы оҥоруохтара

Туймаада ыһыаҕа ыытыллар  Үс Хатыҥ сиригэр ипподром өттүттэн киириигэ саҥа аарка баар буолуоҕа. Итинник быһаарыыны сүрүн аанынан киирии ноҕуруускатын аччатар уонна ыһыах ыалдьыттара киирэллэригэр табыгастаах буоллун диэн санааттан ылыммыттар. Аарканы маастар Алексей Капитонов уолаттарын кытта ойуулаан, киэргэтэн оҥоруохтара. Былаан быһыытынан, онно 12 сэргэ туруохтаах.  Сэргэ — саха норуотугар үс дойдуну,  Үрдүк Айыылары, араҥаччылыыр-харыстыыр сир-дойду иччилэрин уонна өбүгэлэри кытта ситимниир Аар Кудук Мас суолталаах. Бырааһынньык ыалдьыттара манан ааһан иһэн таарыйа  алгыстаныахтара.

Тэрийээччилэр өссө биир сонун киллэриини —  электрокардары туһанары былаанныыллар. Бу көлөлөр киирэр ааркалар уонна ыһыах сүрүн былаһааккатын икки ардыгар сылдьыахтара. «Drivee» сервиһи кытта биир сүбэнэн  ылыллыбыт маннык быһаарыы элбэх киһи мустар сиригэр ыалдьыттар айаннарын түргэтэтиэ, сылдьарга быдан табыгастаах оҥоруо, диэн тэрийээччилэр эрэнэллэр.