Үс Хатыҥҥа – маҥнайгы куурустар сүлүөттэрэ

Үс Хатыҥҥа М.К. Аммосов аатынан ХИФУ бастакы куурустарын сүлүөтэ буолан ааста. Үгэскэ кубулуйбут үтүө тэрээһиҥҥэ куорат баһылыга Евгений Григорьев уонна университет ректора Анатолий Николаев кыттыыны ыллылар.

Евгений Григорьев устудьуоннары саҥа үөрэх дьылынан эҕэрдэлээтэ уонна ыччат  киин куорат сайдыытыгар сүрүн хамсатар күүс буоларын тоһоҕолоон бэлиэтээтэ. Манна даҕатан эттэххэ, Дьокуускай нэһилиэнньэтин орто сааһа – 35 саас.

Куорат баһылыга тэрээһин кыттыылаахтара Дьокуускайга үөрэнэн, үлэһит буолан үүнэн тахсалларыгар, манна олохторун дьолун булалларыгар, доҕотторун, биир санаалаахтарын көрсөллөрүгэр, кыахтарын толору туһаналларыгар, киин куорат сайдыытыгар бэйэлэрин кылааттарын киллэрэллэригэр эрэлин биллэрдэ.  

Бастакы куурус устудьуоннарын сүлүөтэ саҥа үөрэх дьылын арыйда, ыччат түмсүүлээҕин, эрчимнээҕин уонна айар талааннааҕын көрдөрдө.

Хаартыска: yakutskcity.ru саайтан