С гепатиттаах ыарыһахтары эминэн хааччыйыы салҕанар

СӨ Доруобуйа харыстабылын министиэристибэтэ иһитиннэрэринэн, быйыл Саха сиригэр «Уһун уонна көхтөөх үйэлэнии» национальнай бырайыак иитинэн 613 ыарыһах вирустаах гепатиттан эмтэнии толору кууруһун ылла. Онуоха 200 мөл. тахса солк. үп көрүллүбүт.

Чинчийии түмүгүнэн ыарыһахтары эмтээһин көдьүүстээҕэ бэлиэтэммит, ол көрдөрүү 97%-тан тахсыбыт.

Өрөспүүбүлүкэ үрдүнэн С гепатиттаах ыарыһахтары эминэн хааччыйыы салҕанар. Билиҥҥи туругунан маннык ыарыыга ылларбыт 4,5 тыһыынча киһи диспансернай учуокка турар.

Доруобуйа харыстабылын миниистирэ Лена Афанасьева этэринэн, киһи толору кууруһу ыллаҕына, вирус организмтан бүтүннүү тахсар уонна үтүөрэр аакка барар. Ыарыыны кэмигэр булан, эмтэниини анаан, ыарыһахтары үтүөрдүү – «Уһун уонна көхтөөх үйэлэнии» национальнай бырайыак сүрүн сыала-соруга.

Хаартыска: СӨ Ил Дарханын уонна Бырабыыталыстыбатын пресс-сулууспата