Сүбүөкүлэ сэбирдэҕин быраҕарга тиэтэйимэҥ!

Сүбүөкүлэ сэбирдэҕэ каротиноидтарынан, С уонна К битэмииннэринэн уонна клетчатканан баай. Ол эбэтэр харах, уҥуох, иммуннай систиэмэ уонна ас буһарар уорганнар үлэлэригэр бары өттүнэн үтүө дьайыылаах. Онон аһын эрэ ылан баран бөххө быраҕарга ыксаамаҥ – туһаҕа таһаарыҥ.

«Киин куорат» ааҕааччыларыгар сүбүөкүлэ сэбирдэҕиттэн судургу ырысыаптары бэлэмнээтэ. Тускутугар туһаныҥ.  

Харахха туһалаах смузи

Туох наадата:

• сүбүөкүлэ сэбирдэҕэ – 30 г;
• күөх дьаабылыка – 1 уст.;
• киви – 1 уст.;
• уу – 150 мл.

Барыта биир кэлим маасса буолуор диэри блендеринэн илдьиритиҥ.

Оһоҕос үлэтигэр көмөлөөх утах

Туох наадата:

• сүбүөкүлэ сэбирдэҕэ – 40 г;
• оҕурсу – 1 уст.;
• кефир – 200 мл;
• укуруоп – 15 г.

Барыта биир кэлим маасса буолуор диэри блендеринэн илдьиритиҥ.

Уҥуохха туһалаах соус

Туох наадата:

• сүбүөкүлэ сэбирдэҕэ – 50 г;
• грецкэй эриэхэ – 30 г;
• чеснок – 1 өлүүскэ;
• оливка арыыта – 3 ост.нь.;
• лимон суога – 1 ост.нь.

Барыта биир кэлим маасса буолуор диэри блендеринэн илдьиритиҥ. Оҕуруот аһын, балыгы эбэтэр эти кытта сииргэ үчүгэй.

Иммунитет бөҕөргөтөргө

С битэмиининэн баай утаҕы оҥостуохха: 10 сүбүөкүлэ сэбирдэҕин ылан, үрдүгэр 300 мл оргуйбут ууну кутабыт. 10-15 мүн. туруора түһэн баран сылаастыы иһэбит.

Чэгиэн буолуҥ!