«РусСтрой» хампаанньа куорат былааһын быһаарыытын улахаҥҥа уурбат
«РусСтрой» диэн Дьокуускай куоракка Арбитражнай суут дьиэтин тутууга үлэлиир хампаанньа Тупсаҕайдык дьаһанан олоруу быраабылатын кэһэн туран, уулуссалары киртитэрин тохтоппот.
Ол курдук, киин куорат Административнай хамыыһыйата быһаарбытынан, бу тэрилтэ уонунан ахсааннаах ыарахан уйуктаах тиэхиньикэтэ күннэтэ тутуу былаһааккатыттан куорат уулуссаларыгар кири таһар.
Административнай хамыыһыйа бу түбэлтэнэн ааттаммыт тэрилтэ аатыгар иккитэ административнай буруйу оҥоруу туһунан боротокуол да толорон, ыстараап да түһэрэн көрбүтүн үрдүнэн, бэдэрээтчит тиэхиньикэтин көлөһөтүн сууйан, Тупсаҕайдык дьаһанан олоруу быраабылатын тутуһарга ыксаабат, куорат былааһын быһаарыытын улахаҥҥа уурбат.
Олохтоох дьаһалта олох-дьаһах, хомунаалынай хаһаайыстыба уонна энергетика департаменын начаалынньыга Иван Негнюров быһаарарынан, атын тутуу хампаанньаларын кытта куорат ирдэбилин тутуһууга өйдөһүү баар, тэрилтэлэр тутуу былаһааккатыгар көлөһө сууйар анал миэстэни оҥостоллор.
Санатар буоллахха, Арбитражнай суут дьиэтэ Ил Түмэн утары Ярославскай уулуссатыгар тутуллар. Үлэ 2024 сылтан саҕаламмыта уонна тутуу болдьоҕо чуолкай биллибэт. Оттон «РусСтрой» тэрилтэ 2015 с. Дьокуускай куоракка тэриллибит, диэн Олохтоох дьаһалта пресс-сулууспата иһитиннэрэр.
Дьокуускай куорат Тупсаҕайдык дьаһанан олоруу туһунан быраабылатынан тутуу тэрилтэлэрэ куорат уулуссаларын киртиппэт туһуттан тиэхиньикэлэрин көлөһөтүн сууйууну тэрийиэхтээхтэр.
Сонуннар
Ордук ааҕаллар
