Росреестр санатар: сири, хамсаабат баай-дуол эбийиэгин регистрациялатыыга саҥа быраабылалар

2025 сыл кулун тутар 1 күнүттэн сир учаастагар сыһыаннаах сөбүлэһиилэри (атыылааһын, түүлэһии, солуок о.д.а.) регистрациялатарга  сокуоҥҥа уларыйыылар киирэн тураллар.

Ол курдук, билигин сиргэ сыһыаннаах сөбүлэһиилэри түһэрсэргэ, атыылыырга, арендалыырга, солуок уурарга, учаастак кыраныыссата хайаан да  чопчуланан, межеваниеланан, хамсаабат баай-дуол кэлим судаарыстыбаннай реестиригэр (ЕГРН) киллэриллибит буолара ирдэнэр.

Сири бас билээччи эрдэттэн учаастагын туһунан сибидиэнньэлэри ЕГРН-ҥэ киллэрэргэ дьулуһуохтаах. Бу дааннайдар реестргэ киирбэтэх түгэннэригэр, сири бас билии юридическай күүһүн сүтэрэн, атыыланар да, арендаҕа бэриллэр да кыаҕа суох буолар, атын да сөбүлэһиилэр оҥоһуллаллара хааччахтанар.

Маны сэргэ сири бас билиигэ ылбыт киһи сокуон быһыытынан 3 сыл иһигэр учаастагын туһаныахтаах (баһылыахтаах). Ол эбэтэр учаастагын бэлэмнииргэ үлэни-хамнаһы (куурдуу, ыраастааһын, туһаныллыбат тутуулары көтүрүү үлэтин о.д.а.) ыытыахтаах. Сири баһылааһын быраабылатын болдьоммут кэм иһигэр тутуспатахха, учаастагы тута былдьааһын буолбакка, бастаан  муниципалитеттан ыстараап көрүллэн түһэр, ол кэннэ эрэ, өскөтүн бу миэрэни да ахсарбат түгэҥҥэ, былдьыахтарын сөп. 

2025 с. кулун тутар 1 күнүн кэнниттэн ылыллыбыт учаастактарга сири баһылааһын (освоение) болдьоҕо бас билии регистрацияламмыт кэмиттэн ааҕыллар. Оттон эрдэ ылыллыбыт сирдэргэ 3 сыллаах болдьох кулун тутар 1 күнүттэн  саҕаланар.

Тутууну ыытарга аналлаах учаастактарга сири баһылааһын 3 сыллаах болдьоҕун кэннэ тутууну ыытан эбийиэги регистрациялыырыгар 5 сыллаах кэм бэриллэр.

Өлүүлээн тутууну (долевойу) ыытааччы эбийиэги туттарбытын кэннэ 30 үлэ күнүн иһигэр өлүүлээх дьонун бас билиигэ бырааптарын регистрациялара ирдэнэр.

Манна сайабылыанньаны (физическэй сирэйдэртэн уонна сорох тустаах көрүҥ юридическай сирэйдэртэн уратылар) 2026 с. тохсунньу 1 күнүгэр диэри электроннай көрүҥүнэн туталлар.

Юридическай сирэйдэр докумуоннарын электроннай эрэ көрүҥүнэн Госуслуги портал нөҥүө эбэтэр атын сокуоннай ньыманан туттараллара ирдэнэр. Оттон физическэй сирэйдэр уонна тустаах көрүҥ юридическай сирэйдэр (бааһынай фермерскэй хаһаайыстыбалар, садоводческай табаарыстыбалар, гараас кэпэрэтииптэрэ) 2026 с. тохсунньу 1 күнүгэр диэри докумуоннарын кумааҕы көрүҥүнэн туттарыахтарын сөп. 

Бу уларытыылар хамсаабат баай-дуол сөбүлэҥнэрин сааһылыырга уонна бас билээччилэр бырааптарын харыстыырга, мөккүөрдээх түгэннэри аччатарга уонна бас билии юридическай өттүнэн чопчу буоларыгар туһаайыллаллар.