«Роскомнадзор» бобуулаах контены кэбэҕэстик булар

Бобуу ханнык контеннарга ордук сыһыаннааҕый диир буоллахха:
Тохтотуллубут 93 тыһ. тахса матырыйаал интэриниэт хааччаҕын (блокировканы) эргийэ көтүүгэ сыһыаннаах сириэстибэни арбаан хабыллыбыт. Маннык контент хааччаҕа 1235% элбээбит.

- *ЛГБТ-тиэмэтигэр 170,3 тыһыынча контент хааччахтаммыт, эбиллиитэ – 269 %.
- *Оҕо порнографиятыгар сыһыаннаах 155,6 тыһ. матырыйаал тохтообут; о.э. иллэрээ сыллааҕы көрдөрүү 131% эбиллибит. 
- *Норкуотукка сыһыаннааҕын быһыытынан – 229,3 тыһ. (80%), сокуоннай саастарын туола илик оҕолору быраабы кэһэр дьайыыга угуйар хабааннаах 52,2 тыһ. (60%) контент хааччахтаммыт.
«Роскомнадзор» кыраҕы хараҕа «ВКонтакте», «Одноклассники», «Мой мир», «Ответы Mail.ru», Rutube, TikTok, Likee  уонна Telegram ханаалларга туһаайыллар.
Интэриниэти куттала суох оҥоруу киинин сүрүннүүр исписэлииһэ Урван Парфентьев блоктаммыт матырыйаал туох хайа иннинэ көҥүллэммэт, бобуллар контент испииһэгэ кэҥээн биэрбитинэн быһаарар. Холобур, муҥутуур элбэхтик блоктаммыт матырыйаал  тас дойду платформаларыгар киирэргэ көмөлөөх сириэстибэҕэ наадыйыы улааппытыгар ыкса сыһыаннаах.
Судаарыстыба уорганнара быраабы кэһэр контент кэрискэтин кэҥэтэн биэрбиттэрин сыыппара эйгэтигэр оҕо көмүскэллээх буолуутугар үлэлэһэр альянс эмиэ бигэргэтэр. Холобур, VPN уонна арыгыга угуйар контеннар бу иннинэ ити этиллэр кэрискэҕэ суохтара, «сиэрэй зонаҕа» сылдьыбыттар. Оттон күн бүгүн оҕолор көрөр-киирэр сирдэригэр итилэр ончу суох буолуохтаахтара өйдөнөр.
«Социальнай лаборатория» генеральнай дириэктэрэ Наталия Тылевич хааччахтаммыт матырыйаал эбиллиитигэр саҥа, сонун технологическай инструменнар туттуллар буолбуттара тирэх буолбутун эппит. Ол курдук, тиэкистэри анаалыстыырга – «Мир» тиһиги,  ойуулары, биидьийэлэри идентификациялыырга – «Окулус» уонна сабаҕалаан көрөр ырытыыны оҥорор «Вепрь» тиһиги туттар буолбуттар. Инньэ гынан, хааччахтаныахтаах контены булар кыах уонунан бүк улааппытын эппит.