Робот – остолобуой тутаах үлэһитэ

Анал олорор сиргэ сахалыы олбоххо төрөөбүт тылларынан кэпсэтэ олорор оҕолору көрөн аастыбыт. Тас таҥаспытын хаалларар хос аана икки тылынан суруктааҕын көрөммүт, өссө манньыйыах санааҕа куустардыбыт. Сахалыы эйгэ, тыын баара саҥа сылдьар киһиэхэ аантан билиннэ. Кэлбит сорукпутунан аа-дьуо оскуолаҕа хаамыы саҕаланна.

Остолобуойга кыра кылаастар аһаан бүтэн тарҕаһыыларын кэмигэр түбэстибит.  Дьуһуурунай оҕолор сып-сап туттан-хаптан остуолтан иһиттэри хомуйан бардылар. Ол икки ардыгар робот көмөлөһөөччүлэрэ хомуллубут иһити миэстэтигэр таһар үлэтигэр таҕыста. Видео устаары иннигэр хаампыппытыгар, робоппут киниттэн тэйэрбитин күүтэн туран ылла. Арааһа, мэһэйдэттэ...  Үлэһити мэһэйдээмээри, ойоҕостуу сырыттыбыт. Анал бырагырааматын толорор сиригэр сулбутук тиийэ охсоотун кытта дьуһуурунай кыыс иһити уурталаан барарын күүттэ. Саҥа-иҥэ суох.

“Меня другие ждут” диэн сороҕор саҥарбытынан барааччы. Хата, бүгүн тоҕо чуумпурда. Эһиэхэ бэрээдэгин көрдөрөргө дылы эбит дии, – диэн  мичээрдии-мичээрдии остолобуой сибиэдиссэйэ Айталина Петровна кэпсээбитинэн барда. – Тохсунньу 12 күнүттэн үлэтин саҕалаабыта. Оҕолор син үөрэнэн эрэллэр. Биир переменаҕа 12 кылаас тэҥинэн киирэн аһаан ааһар. Биир уруок устата ол иһитин барытын хомуйарга дьуһуурунайдары кытта робот үлэлиир. Бу бүгүн бэһис кылаас оҕолоро дьуһуурунайдыы сылдьаллар. Дьуһуурунай остуолга баар кураанах иһити тиэйэн биэрэрин робот күүтэр уонна тустаах миэстэҕэ аҕалар. «Миигин имэрийиҥ» диэн саҥалаах. Оччоҕуна имэрийэ сатааччы элбэх. Хардатын «мяу» диир. Ол иһин оҕолор бэйэлэрэ номнуо робот МЯУ диэн сүрэхтээбиттэрэ. Онон робот Мяу үлэбитин биллэрдик чэпчэттэ".

Оскуолаҕа өссө иккис робот-көмөлөһөөччү баарын истэммит, иккис этээскэ таҕыстыбыт эрээри, үлэлиир бириэмэтэ илик буолан биэрдэ. Онон, "Киин куорат" кинини кытта кэлин билсиһиэҕэ.