Рис доруобуйаҕа туһата уонна буортута

Бу – былыр-былыргыттан икки атахтааҕы аччыктааһынтан, хоргуйууттаан өрүһүйбүт туораахтаах үүнээйигэ, чахчы да, сүгүрүйүү бэлиэтэ.

Үгүс дойдуларга сүрүн астара. Аан дойду үрдүнэн икки миллиард кэриҥэ киһи риһи үүннэриинэн дьарыктанар, онон эргинэн, айаҕын ииттэн олорор эбит.

«Киин куорат» ааҕааччыларыгар анаан рис туһунан интэриэһинэй чахчылары түмтэ:

Ханнык да туораахтаах үүнээйитээҕэр В бөлөх битэмииннэринэн баай. Ньиэрбэ систиэмэтин, тириини тупсарар уонна бэссэстибэ атастаһыыта бигэ  туруктанарыгар үчүгэй. Ол эрээри ол барыта хаҕыгар сылдьар. Дьэ, ол иһин аан дойду диетологтара обработкаламмыт үрүҥ рис туһалаах бэссэстибэтэ кэмчи, ону ааһан доруобуйаҕа буортулаах диэн санаалаахтар. Аны калорийноһа олус үрдүк – 100 грамҥа 360 ккал. Ол оннугар дьиикэй рискэ крахмала аҕыйах, ону астаныҥ диэн  сүбэлииллэр.

Бороҥ рис битэмииннэринэн ордук баай. Ньиэрбэни уоскутар, баттаҕы уонна тыҥыраҕы тупсарар, мэйии үлэтин көҕүтэр, организмҥа мунньуллубут ууну таһаарар. Ыйааһыны түһэрэргэ, ырарга бастыҥ куруппа.

Кыһыл рис калорийноһа лаппа үрдүк. Тирии туругун, сүрэх үлэтин тупсарар.

Хара рис – иммунитеты бөҕөргөтөр, харахтара мөлтөх, хааннара аҕыйах (анемиялаах) дьоҥҥо үчүгэй. Натрийа аҕыйах буолан, сүрэх уонна бүөр ыарыһахтарга сүбэлииллэр.

Рис хааһы диареяҕа, истэрэ быһыта тыытар дьоҥҥо үчүгэй. Оттон хойуулара хаайтаран эрэйдэнээччилэргэ барсыбат. Диабеттаах дьоҥҥо соччо үчүгэйэ суох ас, арай кыһыл рис буортута суох.