РФ Бэрэсидьиэнэ Дьокуускай 400 сылын бэлиэтиир туһунан Ыйаахха илии баттаата

Бэҕэһээ, муус устар 1 күнүгэр, РФ Бэрэсидьиэнэ Владимир Путин 2032 сылга Дьокуускай куорат төрүттэммитэ 400 сылын бэлиэтиир туһунан дьоһуннаах докумуоҥҥа илии баттаата.
Бу ыйаахха "2032 с. Дьокуускай куорат төрүттэммитэ 400 сылын туоларынан сибээстээн, РФ Бырабыыталыстыбата 2032 с. Дьокуускай куорат 400 сылын туоларын бэлиэтиир туһунан этиитин ылынарга" диэн суруйуллар.
Үбүлүөйдээх датаны бэлиэтиир тэрээһиннэри бэлэмнииргэ уонна ыытарга РФ субъектара уонна олохтоох бэйэни салайыныы уорганнарын былаастара кыттыыны ылалларыгар этиллэр.

СӨ Ил Дархана Айсен Николаев: "Дьокуускай – өрөспүүбүлүкэбит тэбэр сүрэҕэ. Үбүлүөйү ирбэт тоҥҥо турар бастыҥ куорат буола көрсүөхтээх – олохтоох дьонугар- сэргэтигэр, ыалдьыттарыгар саҥардыллыбыт, куттала суох, тупсаҕай көстүүлээх куорат буолуохтаах!" диэн телеграм-каналыгар суруйда.
Ону тэҥэ РФ Бэрэсидьиэнэ Саха сирин уонна киин куоратын өрүү өйүүрүгэр махтанна.